पतिकै अगाडि देवरसँग विवाह गर्न खोजेपछि…

एजेन्सी । भारतको उत्तर प्रदेशस्थित बागपतमा सम्बन्धलाई लिएर अनौठो घटना सार्वजनिक भएको छ। एक महिला काखमा बच्चा र साथमा पतिलाई लिएर मुख्यमन्त्री सामूहिक विवाह योजनाअन्तर्गत आफ्नै देवरसँग विवाह गर्न पुगेकी छन्। सामूहिक विवाह योजनाका लागि आएका आवेदनको जाँच गर्ने क्रममा यो घटना बाहिरिएको हो। अधिकारीहरूले कानुनी रूपमा सम्बन्धविच्छेद भएको प्रमाण मागेपछि महिलाले सादा कागजमा लेखिएको पञ्चायतको निर्णय देखाएकी थिइन्। उनले आफूलाई पति मन नपरेको भन्दै देवरसँगै विवाह गर्ने अडान लिएकी थिइन्। महिलासँगै आएका पतिले पनि उनको भनाइ सही भएको बताएका थिए। आफूलाई नभई आफ्नो भाइलाई मन पराएकाले केही दिनअघि पञ्चहरूले बसेर सम्बन्धविच्छेद गराएको उनको दाबी थियो। दुवैले सादा कागजमा लेखिएको सम्बन्धविच्छेदको कागज पेस गरे पनि अधिकारीहरूले त्यसलाई कानुनी मान्यता दिन अस्वीकार गरेका थिए। अधिकारीहरूका अनुसार सामूहिक विवाह योजनाका लागि २२० वटा अनलाइन आवेदन प्राप्त भएका थिए। तीमध्ये योग्य ठहरिएका १४९ जोडीको अक्टोबर २५ मा विवाह गराइएको थियो। आवेदन जाँचका क्रममा कानुनी सम्बन्धविच्छेदको प्रमाणपत्र पेस गर्न नसकेका चार–पाँच वटा आवेदन रद्द भएका थिए। जिल्ला समाज कल्याण अधिकारी नीलम सिंह चौहानका अनुसार रद्द भएका आवेदनमध्ये एक महिलाले पतिसँग कानुनी रूपमा सम्बन्धविच्छेद नगरी देवरसँग विवाह गर्न चाहेकी थिइन्।