नेपा एपमा नयाँ अपडेट

काठमाडौं । नेपाली प्रयोगकर्ताका लागि तयार गरिएको नेपा एपको नयाँ अपडेटमा दैनिक जीवनलाई सहज बनाउने विभिन्न नयाँ डिजिटल सेवा तथा उपयोगी टुल्स थपिएका छन् । कम्पनीका अनुसार फोटोबाट नेपाली टेक्स्ट निकाल्न सकिने ओसीआर, नियमित रूपमा पानी पिउन सम्झाउने वाटर रिमाइण्डर, जिल्लागत मौसम, तरकारी मूल्य, इन्धन मूल्य, अस्पतालमा उपलब्ध फ्री खाली बेड तथा ब्लड बैंकसम्बन्धी जानकारी लगायतका सुविधा नयाँ अपडेटका मुख्य आकर्षण बनेका छन् । नयाँ अपडेटमा विशेषगरी नेपाली भाषामा डिजिटल काम गर्न उपयोगी हुने ओसिआर र स्वास्थ्य तथा दैनिक जीवनसँग सम्बन्धित वाटर रिमाइण्डरलाई प्राथमिकताका साथ समेटिएको छ । नयाँ अपडेटको आकर्षक सुविधामध्ये एक हो, ओसिआर । उक्त सुविधामार्फत फोटो वा तस्बिरमा रहेका नेपाली अक्षर तथा शब्द डिजिटल टेक्स्टमा रूपान्तरण गर्न सकिन्छ । उदाहरणका लागि, कुनै किताब, पत्रपत्रिका, सूचना, कागजात वा अन्य सामग्रीको फोटो खिचेर त्यसमा भएको नेपाली टेक्स्ट निकाल्न सकिन्छ । जसले नेपाली भाषामा लेखिएका सामग्री पुनः टाइप नगरी डिजिटल रूपमा प्रयोग गर्न सहज बनाउने अपेक्षा गरिएको छ । विद्यार्थी, शिक्षक, पत्रकार, कार्यालयमा काम गर्ने व्यक्ति तथा नेपाली सामग्रीसँग नियमित रूपमा काम गर्ने प्रयोगकर्ताका लागि उक्त सुविधा उपयोगी हुनसक्छ । नयाँ अपडेटमा समावेश गरिएको अर्को महत्त्वपूर्ण सुविधा हो, वाटर रिमाइण्डर । दैनिक व्यस्तताका कारण धेरैले समयमै पानी पिउन बिर्सने गर्छन् । त्यस्तो अवस्थामा वाटर रिमाइण्डरले निर्धारित समयमा पानी पिउन सम्झाउन सहयोग गर्छ । प्रयोगकर्ताले आफ्नो आवश्यकताअनुसार पानी पिउने रिमाइण्डर प्रयोग गर्न सक्छन् । दैनिक जीवनमा पानी पिउने बानीलाई नियमित बनाउन चाहनेका लागि उक्त सुविधा उपयोगी बन्नसक्छ । नयाँ अपडेटमा वर्ल्ड क्लक र बिएमआई क्याल्कुलेटर पनि समावेश छन् । वर्ल्ड क्लकमार्फत विभिन्न देश तथा शहरको स्थानीय समय हेर्न सकिन्छ । विदेशमा रहेका आफन्तसँग सम्पर्क गर्ने, अन्तर्राष्ट्रिय काम गर्ने वा विदेशसँग सम्बन्धित समय व्यवस्थापन गर्नुपर्ने प्रयोगकर्ताका लागि उक्त सुविधा उपयोगी हुनसक्छ । त्यस्तै, बिएमआई क्याल्कुलेटरले उचाइ र तौलका आधारमा शरीरको बडी मास इण्डेक्स गणना गर्न सहयोग गर्छ ।