Saturday, November 21, 2026||
MultiKhabarMultiKhabar

नेपाली फुटबलको प्रतिबन्ध हट्ने बाटो खुल्यो

Share:WhatsAppFacebookX (Twitter)Telegram
नेपाली फुटबलको प्रतिबन्ध हट्ने बाटो खुल्यो
Photo / Coverage: हिमालय टाइम्स

काठमाडौं । विश्व फुटबलको सर्वोच्च निकाय फिफाले अखिल नेपाल फुटबल संघ (एन्फा) माथि लगाएको अन्तर्राष्ट्रिय निलम्बन फुकुवाका लागि सकारात्मक संकेत दिएको छ । तर, त्यसका लागि वर्तमान अध्यक्ष पंकजविक्रम नेम्वाङकै नेतृत्वमा एन्फाको तहगत निर्वाचन सम्पन्न गर्नुपर्ने शर्त राखेको छ । बिहीबार थाइल्याण्डको बैंककमा नेपाल सरकार, राष्ट्रिय खेलकुद परिषद् (राखेप), फिफा र एसियाली फुटबल महासंघ (एएफसी) का प्रतिनिधिबीच भएको छलफलमा सहमति जुटेको हो । बैठकमा फिफा र एएफसीले नेम्वाङ नेतृत्वको एन्फालाई मान्यता दिँदै जिल्ला, प्रदेश र केन्द्रीय तहको निर्वाचन प्रक्रिया अघि बढाउनुपर्ने शर्त राखेको बताइएको छ । फिफाले एन्फाको वर्तमान नेतृत्वलाई स्वीकार गर्दै अबको एक महिनाभित्र तहगत निर्वाचन सम्पन्न गर्न समयसीमा दिएको छ । यससँगै नेपाली फुटबलमाथि लगाइएको अन्तर्राष्ट्रिय प्रतिबन्ध एक महिनाभित्रै हट्ने सम्भावना देखिएको छ । यद्यपि, फिफाले औपचारिकरूपमा प्रतिबन्ध फुकुवा गर्ने निर्णय गरिसकेको छैन । शिक्षा तथा खेलकुदमन्त्री सस्मित पोखरेलले पनि फिफाले निलम्बन फुकुवाको प्रक्रिया अघि बढाउने सहमति भएको बताउनुभयो । उहाँका अनुसार निर्वाचन कसरी र कुन प्रक्रियाबाट गर्ने भन्ने विषयमा फिफाले डिसेम्बरमा प्रस्तावसहितको कार्ययोजना (रोडम्याप) पठाउनेछ । मन्त्री पोखरेलको नेतृत्वमा रहेको नेपाली प्रतिनिधिमण्डल थाइल्याण्डमा रहँदा नै राखेपले एन्फामाथि लगाएको आन्तरिक निलम्बन फुकुवा गरेको थियो । बिहीबार राखेपले प्रशासनिक तथा आर्थिक प्रतिबन्धसहित एन्फामाथि लगाइएका सबै प्रकारका निलम्बन र बन्देज हटाउने निर्णय गरेपछि नेपाली फुटबलको विवाद समाधानतर्फ अघि बढेको हो । एएफसी अवार्ड्स २०२६ को अवसरमा भएको बैठकमा एन्फाको निलम्बन फुकुवा र अब हुने निर्वाचन प्रक्रियाबारे छलफल भएको थियो । बैठकमा नेपालका तर्फबाट मन्त्री पोखरेललगायत सहभागी थिए । त्यस्तै, एएफसीका उपमहासचिव वाहिद कार्डानी र दक्षिण एसिया युनिटका वरिष्ठ व्यवस्थापक सोनम जिग्मे तथा फिफाका एसिया र ओसिनिया सदस्य संघ निर्देशक सञ्जीवन बालसिंगम, सदस्य संघ सुशासन सेवा व्यवस्थापक एमिली डोम्स र दक्षिण एसिया क्षेत्रीय कार्यालयका प्रमुख प्रिन्स रूफस सहभागी हुनुहुन्थ्यो । बैठकमा फिफा र एएफसीले एन्फाको वर्तमान नेतृत्वलाई मान्यता दिँदै निर्वाचन प्रक्रिया अघि बढाउनुपर्नेमा जोड दिएका थिए । जिल्ला र प्रदेश तहका निर्वाचन सम्पन्न गरेर केन्द्रीय निर्वाचन गर्नुपर्ने शर्त राखिएको स्रोतले जनाएको छ । यसअघि एन्फाले नयाँ कार्यसमिति चयनका लागि अर्ली इलेक्सन गर्ने निर्णय गरेपछि विवाद सुरु भएको थियो । एन्फा अध्यक्ष नेम्वाङले समयअगावै निर्वाचन गराउने योजना अघि सारेपछि राखेपले त्यसलाई अस्वीकार गरेको थियो । झापामा हुन लागेको निर्वाचनको पूर्वसन्ध्यामा राखेपले एन्फालाई निलम्बन गर्ने निर्णय गरेपछि विवाद झन् चर्किएको थियो । अब नेम्वाङकै नेतृत्वमा तहगत निर्वाचन गर्ने विषयमा नेपाल सरकार पनि सकारात्मक देखिएको छ । यस विषयमा थप छलफलका लागि एएफसीको प्रतिनिधिमण्डल नेपाल आउनेछ । फिफाले गत असार २४ मा एन्फालाई अर्को निर्णय नहुँदासम्मका लागि निलम्बन गरेको थियो । एन्फाको मामिलामा तेस्रो पक्षको हस्तक्षेप भएको ठहर गर्दै फिफाले प्रतिबन्ध लगाएको थियो । फिफाको निलम्बनपछि नेपाली फुटबलका अन्तर्राष्ट्रिय गतिविधि प्रभावित भएका थिए । पछिल्लो पाँच महिनादेखि नेपाली फुटबल गतिविधि ठप्प हुँदा नेपालले साफ च्याम्पियनसिपसहित महत्त्वपूर्ण अन्तर्राष्ट्रिय प्रतियोगिता गुमाउनुपरेको थियो । फिफाको प्रतिबन्धले नेपाली फुटबलको अन्तर्राष्ट्रिय सहभागितामात्र रोकेको थिएन, एन्फाको नियमित प्रशासनिक र आर्थिक गतिविधिमा समेत असर परेको थियो । त्यसैले निलम्बन फुकुवाका लागि सरकार र फुटबलका अन्तर्राष्ट्रिय निकायबीच लामो समयदेखि छलफल हुँदै आएको थियो । अब फिफाले नै एन्फा निलम्बन फुकुवाको प्रक्रिया अगाडि बढाउँछ : मन्त्री पोखरेलशिक्षा तथा खेलकुदमन्त्री सस्मित पोखरेलले नेपाली फुटबलमाथि अन्तर्राष्ट्रिय फुटबल महासंघ (फिफा) ले लगाएको निलम्बन फुकुवाको प्रक्रिया अघि बढेको बताउनुभएको छ । थाइल्याण्डमा फिफा र एसियन फुटबल महासंघ (एएफसी) का अध्यक्षसहितका पदाधिकारीसँग छलफल गरेर स्वदेश फर्किनुभएका उहाँले फिफा अध्यक्ष जियानी इन्फान्टिनोलाई नेपाल भ्रमणको निम्तोसमेत दिएको जानकारी दिनुभएको हो । मन्त्री पोखरेलका अनुसार निलम्बन फुकुवासँगै फिफा र एएफसी एन्फाको तहगत निर्वाचन गराउन सहमत भएका छन् । ‘अब फिफाले नै एन्फा निलम्बन फुकुवाको प्रक्रिया अगाडि बढाउँछ । तहगत निर्वाचनको हकमा पनि डिसेम्बरसम्ममा रोडम्यापको प्रस्ताव लिएर आउने भन्नुभएको छ,’ पत्रकार सम्मेलनमा उहाँले भन्नुभयो । एन्फाको निर्वाचन पुरानै नेतृत्वबाट गर्ने वा अन्तरिम कमिटी बनाएर गर्ने भन्ने विषय भने टुंगिन बाँकी रहेको पनि उहाँले बताउनुभयो । ‘तहगत निर्वाचन गर्ने भन्नेमा सहमति भएको हो । कुन मोडालिटीमा गर्ने, कस्तो गर्ने र कहिले गर्ने भन्ने विषयमा टुंगिन बाँकी छ’, मन्त्री पोखरेलले भन्नुभयो । उहाँका अनुसार फिफाले नेपाली फुटबलमा सरकारको भूमिकालाई ‘थर्ड पार्टी इन्टरफेरेन्स’ का रूपमा बुझेको थियो । तर, सरकारले नेपालको आफ्नै कानुन र राज्यको अधिकारबारे स्पष्ट पारेपछि फिफा सकारात्मक बनेको उहाँले बताउनुभयो । ‘राज्यले गर्ने काम आफैं गर्छ । देशको कानुनअनुसार काम हुन्छ । त्योभन्दा बाहेक हामीले केही हस्तक्षेप गर्दैनौं भनेर उहाँहरूलाई जानकारी गरायौं । त्यसमा उहाँहरू सकारात्मक हुनुभयो,’ उहाँले भन्नुभयो ।

Share:WhatsAppFacebookX (Twitter)Telegram

Read Complete Original Article

Published originally on हिमालय टाइम्स

Visit Publisher Site →

Related News

🇳🇵 Nepal
सन्तोषी श्रेष्ठलाई दुई स्वर्ण, दुवैमा कोर्स रेकर्ड
Latest NewsJust now

सन्तोषी श्रेष्ठलाई दुई स्वर्ण, दुवैमा कोर्स रेकर्ड

काठमाडौं । नेपाली धाविका सन्तोषी श्रेष्ठले माल्दिभ्समा आयोजित १७औँ संस्करणको धिरागु रोड रेस २०२६ मा दुई विधामा कोर्स रेकर्डसहित स्वर्ण पदक जित्नुभएको छ । हुलुमालेस्थित सेन्ट्रल पार्कमा आयोजित प्रतियोगितामा सन्तोषीले महिला हाफ म्याराथन र पाँच किलोमिटर दौडमा स्वर्ण जित्नुभएको हो । उहाँले हाफ म्याराथन एक घण्टा २६ मिनेट ३९ सेकेन्डमा पूरा गर्दै नयाँ कोर्स रेकर्ड बनाउनुभयो । यसअघि पनि दुवै ...

हिमालय टाइम्स
एनएफएलमा तीन टिमका लागि २० वटा प्रस्ताव
Latest NewsJust now

एनएफएलमा तीन टिमका लागि २० वटा प्रस्ताव

काठमाडौं । नेपाल फुटबल लिग (एनएफएल)मा तीन नयाँ टोली थप्न आह्वान गरिएको बोलपत्रमा २० वटा प्रस्ताव परेको छ । त्यसमध्ये छनोट हुने तीन टिमले मात्रै लिग खेल्न पाउनेछन् । नयाँ टोलीका लागि विराटनगर, धरान, जनकपुर, वीरगञ्ज, हेटौँडा, भक्तपुर, नेपालगञ्ज र सुर्खेतका लागि प्रस्ताव माग गरिएको थियो । एनएफएलका कमिश्नर राजु घिसिङले भन्नुभयो, ‘आठ शहर लक्षित गरी खोलिएको बोलपत्रमा २० वटा प्रस्ताव ...

हिमालय टाइम्स
ह्यारी केन केही महिना मैदानबाहिर रहने
Latest NewsJust now

ह्यारी केन केही महिना मैदानबाहिर रहने

म्युनिख । इंग्ल्याण्डका कप्तान तथा जर्मन क्लब बायर्न म्युनिखका स्ट्राइकर ह्यारी केन बायाँ गोलीगाँठाको लिगामेन्ट च्यातिएपछि केही महिनाका लागि मैदानबाहिर रहने हुनुभएको छ । बायर्नले कोलोनसँग खेलेको जर्मन बुन्डेसलिगा खेलमा चोट लागेपछि केनले आगामी केही महिना खेल्न नसक्ने जनाएको हो । बायर्न म्युनिख र कोलोनबीचको खेल १-१ को बराबरीमा सकिएको थियो । खेलको २०औँ मिनेटमा कोलोनका डिफेन्डर जोएल स्मिडसँगको टक्करपछि केन ...

हिमालय टाइम्स
कस्तो छ आइतबारको दिन तपाईको ?
Latest NewsJust now

कस्तो छ आइतबारको दिन तपाईको ?

२०८३ मंसिर ६ गते आइतबारको राशिफल मेषतपाईको दिन शुभ रहने छ । काममा सफल बन्नु हुने छ । मिष्ठान्न भोजन मिल्ने छ । दाम्पत्य जिवन सुखद हुने छ । वृषस्वास्थ्यमा समस्या आउन सक्छ । अनावश्यक यात्रा तथा व्यर्थको कामको लागी धन खर्च हुन सक्छ । मिथुनव्यापार–व्यवसायमा सफलता मिल्ने छ । धनलाभ होला । सन्तान र स्त्रीबाट सहयोग मिल्न सक्छ । कर्कटदिन शुभ रहने छ ...

टक्सार
Multikhabar App

All Information In One Place

Real-time headlines from trusted sources. Get the app now — stay updated, inspired, and ahead with breaking news!

Get it on Google Play