नक्कली प्रमाणपत्र पेस गरेर जागिर खाएको आरोपमा बालविकास सहयोगीविरुद्ध मुद्दा

काठमाडौं । कैलालीको बर्दगोरिया गाउँपालिका–४ स्थित जगन्नाथ आधारभूत विद्यालयमा कार्यरत बालविकास सहयोगी कार्यकर्ता हरिराम डंगौराविरुद्ध नक्कली शैक्षिक प्रमाणपत्र पेस गरी पद, लाभ र सुविधा लिएको आरोपमा मुद्दा दायर भएको छ। अख्तियार दुरुपयोग अनुसन्धान आयोगले डंगौराविरुद्ध भ्रष्टाचारको आरोपमा आइतबार काठमाडौंस्थित विशेष अदालतमा आरोपपत्र दायर गरेको हो। आयोगका अनुसार हरिराम चौधरी भन्ने हरिराम डंगौरा थारुले श्री मालिका माध्यमिक विद्यालय, चौमाला, कैलालीबाट एसएलसी उत्तीर्ण गरेको भन्दै नक्कली मार्कसिट र चारित्रिक प्रमाणपत्र पेस गरेका थिए। नक्कली शैक्षिक प्रमाणपत्रका आधारमा राष्ट्रसेवकको पद बालविकास सहयोगी कार्यकर्ता (शिक्षक) मा कार्यरत रही ओहदा, लाभ र सुविधा प्राप्त गरेको अनुसन्धानबाट खुलेको आयोगले जनाएको छ। आयोगले डंगौराविरुद्ध भ्रष्टाचार निवारण ऐन, २०५९ को दफा १६ को उपदफा (१) बमोजिमको कसुरमा सोही कानुनी व्यवस्थाअनुसार कैद र जरिवाना सजायको मागदाबीसहित आरोपपत्र दायर गरेको जनाएको छ।