दसैँमा काठमाडौं उपत्यकामा प्रहरीको निःशुल्क बस सेवा, तीन रुटमा सञ्चालन

काठमाडौं । बडादसैँको अवसरमा नेपाल प्रहरीले काठमाडौं उपत्यकामा सर्वसाधारणका लागि निःशुल्क बस सेवा सञ्चालन गरेको छ । सार्वजनिक यातायातको उपलब्धता कम हुने समयमा यात्रुको आवागमन सहज बनाउन प्रहरीले तीनवटा रुटमा बस सेवा सञ्चालन गरेको हो । प्रहरीका अनुसार कात्तिक ३ र ४ गते सञ्चालन हुने उक्त सेवा पहिलो दिन मंगलबार दिउँसो ४ बजेदेखि सुरु गरिएको थियो । टीकाको दिन बुधबार बिहान ८ बजे पहिलो सिफ्ट सञ्चालन भएको छ भने दोस्रो सिफ्ट दिउँसो ३ः३० बजे सञ्चालन हुने जनाइएको छ । तीन रुटमा बस सञ्चालन रुट नम्बर १: नक्सालबाट सुरु हुने बस बालुवाटार, टिचिङ, चक्रपथ, नयाँ बसपार्क, बालाजु, स्वयम्भू, कलंकी, बल्खु, सातदोबाटो, लगनखेल, जावलाखेल, थापाथली, माइतीघर, पुतलीसडक, कृष्णपाउरोटी र जयनेपाल हल हुँदै पुनः नक्साल फर्किनेछ । रुट नम्बर २: नक्सालबाट रत्नपार्क, बानेश्वर, कोटेश्वर, सल्लाघारी, सूर्यविनायक चोक हुँदै पुनः कोटेश्वर, विमानस्थल, गौशाला, चाबहिल, सुकेधारा, चक्रपथ, टिचिङ र बालुवाटार हुँदै नक्साल पुग्नेछ । रुट नम्बर ३: नक्सालबाट सोह्रखुट्टे, बालाजु चोक, नयाँ बसपार्क, नारायणगोपाल चोक, चक्रपथ, सुकेधारा, गौशाला, विमानस्थल, कोटेश्वर, सातदोबाटो, एकान्तकुना, बल्खु, कलंकी, नयाँ बसपार्क, चक्रपथ र महाराजगन्ज हुँदै पुनः नक्साल फर्किनेछ । दसैँका बेला सार्वजनिक यातायातको उपलब्धता कम हुँदा सर्वसाधारणलाई आवतजावतमा सहजता प्रदान गर्ने उद्देश्यले निःशुल्क बस सेवा सञ्चालन गरिएको प्रहरीले जनाएको छ ।