दशैंपछि मुस्ताङमा पर्यटकको ओइरो, दुई दिनमै झन्डै ८ हजार पुगे

मुस्ताङ । बाढीपहिरो र सडक अवरोधका कारण सुस्ताएको मुस्ताङको पर्यटन व्यवसायमा दसैँपछि पुन: चहलपहल बढ्न थालेको छ। केही समय सुनसान बनेका यहाँका पर्यटकीय स्थलमा स्वदेशी तथा विदेशी पर्यटकको आगमन बढेसँगै पर्यटन व्यवसायीमा उत्साह थपिएको छ। दशैंको टीकापछि दुई दिनमै ७ हजार ८४६ पर्यटक मुस्ताङ पुगेका छन्। जिल्ला प्रहरी कार्यालय मुस्ताङका अनुसार दशैंको टीकापछिको पहिलो दिन बिहीबार ३ हजार ३३ जना र शुक्रबार ४ हजार ८१३ जना पर्यटक बेनी–जोमसोम सडकमार्ग हुँदै मुस्ताङ भित्रिएका हुन्। पछिल्ला दिनमा पर्यटकको आगमन निरन्तर बढ्दै गएको प्रहरी निरीक्षक तथा सूचना अधिकारी ईश्वर महतले जानकारी दिए। यसअघि भोटेकोशीमा आएको विनाशकारी बाढी र असोज ११ गतेको भारी वर्षाले निम्त्याएको बाढीपहिरो तथा नदी कटानका कारण बेनी–जोमसोम सडकमार्ग अवरुद्ध हुँदा मुस्ताङको पर्यटन क्षेत्र प्रभावित बनेको थियो। सडक सम्पर्कमा आएको अवरोधले पर्यटकको आवागमन घटेपछि होटल, यातायात र अन्य पर्यटन व्यवसायसमेत सुस्ताएका थिए। दशैंपछि सडकमार्ग हुँदै पर्यटक आउने क्रम बढ्न थालेसँगै व्यवसाय पुन: चलायमान हुने संकेत देखिएको छ। प्रहरीको तथ्याङ्कअनुसार यस वर्ष घटस्थापनादेखि विजयादशमीसम्मको अवधिमा बेनी–जोमसोम सडकमार्गबाट ५ हजार ६६३ पर्यटक मुस्ताङ पुगेका थिए। तीमध्ये ३ हजार ७३८ पुरुष र १ हजार ९२५ महिला थिए। दशैंको मुख्य बिदा सकिएसँगै पर्यटकको आगमनमा देखिएको वृद्धिले आगामी दिनमा पर्यटन गतिविधि थप बढ्ने अपेक्षा गरिएको छ। चालु आर्थिक वर्षको पर्यटक आगमन विवरण हेर्दा पनि मुस्ताङमा भ्रमण गर्नेको सङ्ख्या उल्लेख्य देखिन्छ। साउनमा ३० हजार ५३४, भदौमा २० हजार २६८ र असोजमा १८ हजार ६०१ पर्यटक मुस्ताङ पुगेका थिए। प्राकृतिक विपद् र सडक अवरोधका कारण प्रभावित भएको पर्यटन क्षेत्र दशैं–तिहारको बिदासँगै पुन: गति लिने अपेक्षा गरिएको छ। दशैं र तिहारको लामो बिदामा परिवार तथा साथीभाइसँग घुम्न निस्कने आन्तरिक पर्यटकका लागि मुस्ताङ प्रमुख गन्तव्यका रूपमा परिचित छ। सरकारी कर्मचारी, बैंक तथा वित्तीय संस्थामा कार्यरत कर्मचारी र देशका विभिन्न स्थानबाट घुमफिरका लागि निस्कने यात्रुको आगमनले यस समयमा पर्यटन व्यवसायलाई थप टेवा पुर्‍याउने गर्छ। विदेशबाट दशैं मनाउन स्वदेश फर्किएका नेपालीसमेत मुस्ताङ भ्रमणमा जाने भएकाले तिहार र छठसम्म पर्यटकको चाप बढ्ने आशा व्यवसायीले गरेका छन्। धार्मिक आस्था र प्राकृतिक सुन्दरताको सङ्गम मानिने मुस्ताङमा मुक्तिनाथ मन्दिर प्रमुख आकर्षण हो। मुक्तिनाथ दर्शनसँगै पर्यटकले कोरला नाका, लोमान्थाङ दरबार, झोङ गुफा, घर गुम्बा, चोङ्सी गुफा, ढुम्बाताल र टिटी ताललगायतका गन्तव्य घुम्ने गर्छन्। प्राचीन बस्ती, मौलिक संस्कृति, ऐतिहासिक सम्पदा र हिमाली भू–दृश्यले यस क्षेत्रलाई स्वदेशी तथा विदेशी पर्यटकका लागि आकर्षक बनाएको छ। मुस्ताङको पर्यटन प्राकृतिक सौन्दर्यमा मात्र सीमित छैन। यहाँको जैविक विविधता, हिमाली जीवनशैली, धार्मिक स्थल र सांस्कृतिक पहिचानले पनि पर्यटकलाई आकर्षित गर्छन्। विशेषगरी मुक्तिनाथ दर्शनका लागि आउने धार्मिक पर्यटक र लोमान्थाङसहितका हिमाली क्षेत्र घुम्न चाहने यात्रुको उपस्थितिले स्थानीय अर्थतन्त्रमा प्रत्यक्ष योगदान पुर्‍याउँदै आएको छ। लामो समय सडक अवरोधका कारण पर्यटकको आवागमन घटेपछि चिन्तित बनेका पर्यटन व्यवसायी अहिले पर्यटक बढ्न थालेसँगै आशावादी देखिएका छन्। पर्यटकको चहलपहल बढेमा होटल, रेस्टुरेन्ट, यातायात, स्थानीय उत्पादनको बिक्री तथा अन्य सेवामूलक व्यवसायले गति लिनेछ। दशैंपछि देखिएको पर्यटकको वृद्धिले मुस्ताङको पर्यटन क्षेत्रमा सुधारको सङ्केत गरे पनि सडकको नियमित सञ्चालन, सुरक्षित यात्रा र प्रभावकारी व्यवस्थापन आगामी दिनका लागि महत्त्वपूर्ण रहनेछ। तिहार र छठसम्म पर्यटकको आगमन बढ्दै गएमा प्राकृतिक विपद्का कारण सुस्ताएको मुस्ताङको पर्यटन व्यवसायलाई पुन: लयमा फर्काउन मद्दत पुग्ने अपेक्षा गरिएको छ। The post दशैंपछि मुस्ताङमा पर्यटकको ओइरो, दुई दिनमै झन्डै ८ हजार पुगे appeared first on Corporate Khabar : Nepals First Corporate News Magazine and Portal.