दमकमा चारदिने कला, साहित्य तथा संगीत महोत्सव सम्पन्न

दमक । झापाको दमकमा भाषा, साहित्य, कला र संगीतलाई केन्द्रमा राखेर आयोजित चारदिने महोत्सव सम्पन्न भएको छ । नाता फाउन्डेसनको आयोजनामा बिहीबारदेखि आइतबारसम्म सञ्चालन भएको महोत्सवले स्थानीय तथा राष्ट्रियस्तरका स्रष्टा, कलाकार र संगीतकर्मीलाई एउटै मञ्चमा जोडेको छ । नेपाल प्रज्ञा प्रतिष्ठानका कुलपति कुमार नगरकोटीको प्रमुख आतिथ्यतामा उद्घाटन भएको महोत्सवमा साहित्यिक विमर्श, कविता वाचन, गजल प्रस्तुति, कला प्रदर्शनी, सिर्जनात्मक कार्यशाला तथा सांगीतिक कार्यक्रम आयोजना गरिएका थिए । महोत्सवमा ‘सिर्जनामा युवा’, ‘आख्यानमा के छ र ?’, ‘माटोको सुगन्ध’ र ‘दमकले सिर्जना मार्‍यो कि मर्‍यो ?’ लगायतका विषयमा छलफल तथा विमर्श गरिएको थियो । ती सत्रमा साहित्यकार, कवि, कलाकार, युवा उद्यमी र विभिन्न क्षेत्रका व्यक्तित्वले नयाँ पुस्ताको सिर्जनात्मक सम्भावना, स्थानीय साहित्यिक अवस्था, भाषा, संस्कृति र पहिचानका विषयमा विचार राखेका थिए । महोत्सवमा नेपाल प्रज्ञा प्रतिष्ठानका कुलपति नगरकोटीसहित विभिन्न पुस्ताका कविहरूले कविता वाचन गरेका थिए । त्यसैगरी गजल प्रस्तुति, सारंगी तथा बाँसुरीको मौलिक धुन र विभिन्न सांगीतिक प्रस्तुतिले महोत्सवलाई थप आकर्षक बनाएको थियो । समापन समारोह मिक्लाजुङ गाउँपालिकाका अध्यक्ष बबि राईको प्रमुख आतिथ्यतामा सम्पन्न भएको थियो । कार्यक्रममा विभिन्न विद्यालय तथा सांस्कृतिक संस्थाले गीत, नृत्य र सांगीतिक प्रस्तुति दिएका थिए । रिलायन्स विद्यालयका विद्यार्थी, दमक नेवा खलः, रिलायन्स एकेडेमी तथा विभिन्न सांगीतिक ब्यान्डले प्रस्तुति दिएका थिए । महोत्सव सफल बनाउन सहयोग गर्ने संघसंस्था, प्रायोजक, अतिथि तथा सहयोगीलाई मायाको चिनो प्रदान गरी सम्मान गरिएको थियो । नेपाल लिटरेरी ग्रुपका अध्यक्ष प्रकाश बुढाथोकीले दमकमा कला, साहित्य र संगीतका लागि साझा मञ्च निर्माण गर्नु महोत्सवको मुख्य उद्देश्य रहेको बताउनुभयो । स्थानीय प्रतिभा र मौलिक संस्कृतिलाई राष्ट्रियस्तरका स्रष्टासँग जोड्दै दमकलाई सिर्जना, संवाद र कलाको जीवन्त केन्द्रका रूपमा विकास गर्ने प्रयास गरिएको उहाँको भनाइ थियो । महोत्सवले व्यापारिक केन्द्रका रूपमा परिचित दमकको साहित्यिक तथा सांस्कृतिक पहिचानलाई थप उजागर गरेको आयोजकले जनाएको छ । स्थानीय प्रतिभालाई निरन्तर अवसर प्रदान गर्दै यस्ता गतिविधिलाई नियमित बनाउनु आवश्यक रहेकोमा सहभागीले जोड दिएका छन् ।