तीन महिनादेखि अवरुद्ध खाँदबारी–किमाथाङ्का सडक सञ्चालनमा

संखुवासभा । नेपाली सेनाको सहयोगमा तीन महिनादेखि अवरुद्ध खाँदबारी–किमाथाङ्का सडकखण्ड पुनः सञ्चालनमा आएको छ । भोटखोला गाउँपालिका–२ स्थित छुम्सुरमा पहिरो खसेपछि अवरुद्ध सडक सोमबार साँझदेखि सञ्चालनमा आएको हो । नेपाल र चीन जोड्ने रणनीतिक महत्त्वको यो सडक गत साउनमा ठूलो चट्टानसहित पहिरो खसेपछि पूर्ण रूपमा अवरुद्ध भएको थियो । सडक खुलाउन उत्तर–दक्षिण (कोशी) राजमार्ग आयोजनाको आग्रहमा नेपाली सेनाको नं. १ विकास निर्माण गणअन्तर्गत छुम्सुर पोस्ट र श्री इन्द्रदल गुल्मको सैनिक टोली परिचालन गरिएको थियो । ठूला चट्टानका कारण सामान्य उपकरण प्रयोग गरेर पहिरो हटाउन कठिन भएपछि सेनाले विस्फोटक पदार्थ प्रयोग गरी चट्टान फुटाएको थियो। त्यसपछि आयोजनाले पहिरोको गेग्रान र लेदो हटाएर सडक सञ्चालनमा ल्याएको हो । उत्तर–दक्षिण (कोशी) राजमार्ग आयोजनाका प्रमुख रामबहादुर गुरुङले भौगोलिक अवस्थाका कारण पहिरो पन्छाउन निकै कठिन भएको बताए। चुनौतीपूर्ण परिस्थितिमा नेपाली सेनाले महत्त्वपूर्ण योगदान पुर्‍याएको उनको भनाइ छ । खाँदबारीबाट करिब १४१ किलोमिटर र किमाथाङ्काबाट करिब २१ किलोमिटर दूरीमा रहेको छुम्सुरमा सडक अवरुद्ध हुँदा भोटखोला क्षेत्रका स्थानीयको आवागमन तथा खाद्यान्न ढुवानी प्रभावित हुँदै आएको थियो । सडक पुनः सञ्चालनमा आएसँगै स्थानीयलाई राहत मिल्ने अपेक्षा गरिएको छ । रसुवागढी, तातोपानी र कोरला नाकामा प्राकृतिक विपद् तथा सडक अवरोधका कारण आवागमन प्रभावित भइरहेका बेला किमाथाङ्का सडक खुल्नुले उत्तरी सीमासँगको पारवहन र आवागमन सहज बनाउन सहयोग पुग्ने अपेक्षा गरिएको छ । नेपाल, भारत र चीनलाई जोड्ने सबैभन्दा छोटो जोगबनी–किमाथाङ्का सडक मार्गअन्तर्गत कडा चट्टानयुक्त १०.८ किलोमिटर ट्र्याक नेपाली सेनाले हेलिकप्टरमार्फत निर्माण सामग्री ढुवानी गरेर निर्माण गरेको थियो । गत वैशाखमा हस्तान्तरण गरिएको उक्त सडक सञ्चालनमा आएसँगै संखुवासभासहित धनकुटा, तेह्रथुम, सुनसरी, मोरङ, झापा र भोजपुरका बासिन्दा प्रत्यक्ष लाभान्वित हुने अपेक्षा गरिएको छ ।