टाइगर श्राफको कारमा गोली चलाएर नेपाल भाग्ने योजना, २४ घण्टाभित्रै पक्राउ परे तीन अभियुक्त

काठमाडौं । बलिउड अभिनेता टाइगर श्राफको कारमा गोली प्रहार गरेर नेपाल भाग्ने तयारीमा रहेका तीन अभियुक्तलाई भारतीय प्रहरीले राजस्थानको कोटाबाट पक्राउ गरेको छ । घटनाको करिब २४ घण्टाभित्रै पक्राउ परेका उनीहरूमध्ये एक जना नाबालिगसमेत रहेको भारतीय सञ्चारमाध्यमले जनाएका छन् । राजस्थानको कोटा प्रहरीले सोमबार बिहान रेलमार्ग हुँदै दिल्ली पुगेर नेपाल भाग्ने तयारीमा रहेका तीनै जनालाई पक्राउ गरेको हो । कोटा सहरकी प्रहरी अधीक्षक (एसपी) तेजस्विनी गौतमका अनुसार मुम्बई प्रहरीबाट बिहान करिब ९ः४५ बजे सूचना प्राप्त भएपछि प्रहरी टोली परिचालन गरिएको थियो । त्यसपछि पुणे–जयपुर एक्सप्रेसमा खोजी गर्दा करिब १५ मिनेटभित्रै उनीहरूलाई नियन्त्रणमा लिइएको थियो । प्रहरीका अनुसार पक्राउ पर्नेमा हरियाणाको सोनीपतका रेहान, बिहारको बेगुसरायका ऋतिक कुमार उर्फ रोशन र एक नाबालिग छन् । ऋतिक मुम्बईमा राइड सेयरिङ सेवा ¥यापिडोका चालकका रूपमा काम गर्दै आएका थिए भने अन्य दुई जना मजदुरीमा संलग्न रहेको प्रारम्भिक विवरणमा उल्लेख छ । प्रारम्भिक सोधपुछमा उनीहरू मुम्बईबाट रेल चढेर जयपुर हुँदै दिल्ली पुग्ने र त्यसपछि नेपाल भाग्ने योजनामा रहेको खुलेको प्रहरीले जनाएको छ । उनीहरूलाई थप अनुसन्धानका लागि मुम्बई प्रहरीको जिम्मा लगाउने प्रक्रिया अघि बढाइएको छ । गोलीकाण्डको अनुसन्धानमा नयाँ मोडअक्टोबर १८ आइतबार साँझ मुम्बईको जुहू क्षेत्रमा टाइगर श्राफको कारलाई लक्षित गरी गोली प्रहार भएको थियो । घटनामा अभिनेता श्राफ सकुशल रहे पनि उनका चालक र अर्का एक व्यक्ति घाइते भएका भारतीय सञ्चारमाध्यमले जनाएका छन् । भारतीय सञ्चारमाध्यमका अनुसार पक्राउ परेकामध्ये रेहानको अनिल पण्डितसँग सम्पर्क रहेको प्रारम्भिक अनुसन्धानमा खुलेको छ । प्रहरीका अनुसार अनिल पण्डितको लरेन्स बिश्नोई समूहसँग सम्बन्ध रहेको बताइएको छ । तर, उक्त सम्पर्क र टाइगर श्राफमाथिको गोलीकाण्डबीचको सम्बन्धबारे विस्तृत अनुसन्धान हुन बाँकी छ । प्रहरीले घटनामा प्रयोग भएको हतियार भने पक्राउ परेका अभियुक्तबाट तत्काल बरामद गर्न नसकेको जनाएको छ । गोली प्रहारको उद्देश्य, घटनामा अन्य व्यक्तिको संलग्नता र कथित आपराधिक सञ्जालको भूमिकाबारे थप अनुसन्धान भइरहेको छ । तीनै अभियुक्त पक्राउ परेसँगै घटनाको अनुसन्धानले नयाँ मोड लिएको छ । अब मुम्बई प्रहरीले उनीहरूमाथि गर्ने विस्तृत सोधपुछबाट गोलीकाण्डको योजना, त्यसमा संलग्न अन्य व्यक्ति र नेपाल भाग्ने तयारीको वास्तविकताबारे थप विवरण खुल्ने अपेक्षा गरिएको छ ।