जावलाखेलमा जारी गोदावरी फूल प्रदर्शनी दुई दिन थपियो, अब कात्तिक १८ गतेसम्म सञ्चालन हुने
काठमाडौं। प्रतिकूल मौसमका कारण प्रभावित भएको १९औँ गोदावरी फूलको प्रतियोगितात्मक प्रदर्शनीको अवधि दुई दिन थप गरिएको छ। ललितपुरको जावलाखेलमा सञ्चालन भइरहेको प्रदर्शनी अब कात्तिक १८ गते बुधबारसम्म सञ्चालन हुने भएको छ। फ्लोरिकल्चर एसोसिएसन नेपाल (फ्यान) को आयोजनामा कात्तिक १२ गतेदेखि १६ गतेसम्म सञ्चालन गर्ने गरी तय गरिएको प्रदर्शनीको अवधि दर्शक तथा अवलोकनकर्ताको सहजताका लागि थप गरिएको फ्यानका अध्यक्ष राजेश भक्त श्रेष्ठले जानकारी दिए । प्रदर्शनीको पहिलो दिन अपेक्षाभन्दा उत्साहजनक कारोबार हुनुका साथै अवलोकनकर्ताको उल्लेख्य सहभागिता रहेको आयोजकले जनाएको छ। तर, मौसममा आएको प्रतिकूलतासँगै शुक्रबार र शनिबार भएको अविरल वर्षाका कारण प्रदर्शनीस्थलमा दर्शकको आवागमन प्रभावित भएको थियो। वर्षाका कारण मेला स्थल नै बन्द गर्नुपर्ने अवस्था आएपछि धेरै फूलप्रेमी तथा सर्वसाधारण प्रदर्शनी अवलोकन गर्नबाट वञ्चित भएका थिए। वर्षाका कारण प्रदर्शनी अवलोकन गर्न छुटेका पुष्पप्रेमी, व्यवसायी तथा सर्वसाधारणलाई थप अवसर प्रदान गर्ने उद्देश्यले मेला दुई दिन थप गरिएको मेला संयोजक समन महर्जनले बताए। थप गरिएको अवधिमा प्रदर्शनीमा विभिन्न प्रजातिका मौसमी तथा सदाबहार फूल, पुष्प सजावट, नर्सरीजन्य उत्पादन तथा पुष्प व्यवसायसँग सम्बन्धित सामग्रीको अवलोकन र खरिद गर्न सकिने आयोजकले जनाएका छन् । फ्यानले प्रतिकूल मौसमका कारण यसअघि प्रदर्शनीमा सहभागी हुन नसकेका फूलप्रेमी, उपभोक्ता तथा सर्वसाधारणलाई कात्तिक १८ गतेसम्म जावलाखेलमा सञ्चालन हुने प्रदर्शनीमा सहभागी हुन आग्रह गरेको छ।
Read Complete Original Article
Published originally on टक्सार
