जनता र पार्टीलाई जोड्न मंसिरभरि देशव्यापी अभियान चलाउने गगन थापाको घोषणा

काठमाडौं । नेपाली कांग्रेसका सभापति गगन थापाले पार्टी र जनताबीचको सम्बन्ध थप सुदृढ बनाउन मंसिर महिनाभरि देशव्यापी अभियान सञ्चालन गर्ने घोषणा गरेका छन्। नयाँ कार्यसमिति सदस्यहरूको शपथग्रहणपछि पार्टी कार्यालय सानेपामा बसेको केन्द्रीय कार्यसमितिको पहिलो बैठकमा सभापति थापाले ‘हामी तयार छौँ’ भन्ने सन्देशसहित अभियान सञ्चालन गरिने बताएका हुन्। उनले छिट्टै पार्टीको पूर्ण बैठक बसेर सबैको धारणा सुन्ने र त्यसका आधारमा आगामी चार वर्षका लागि कार्यतालिका बनाएर अनुशासित ढंगले काम अघि बढाउने बताए। प्रतिपक्षको प्रमुख जिम्मेवारी सरकारका कामको निगरानी गर्नु भएकाले कानुनी शासनको उल्लंघनविरुद्ध कांग्रेस सशक्त रूपमा उभिने उनको भनाइ छ। थापाले तिहार र छठलगत्तै लिडरसिप एकेडेमी, इलेक्सन ब्युरो र गभर्नन्स इन्स्टिच्युटले काम सुरु गर्ने जानकारी पनि दिए। नेता तथा कार्यकर्ताको रुचिअनुसार जिम्मेवारी बाँडफाँट गरिने र सहमहामन्त्रीहरूलाई स्पष्ट कार्ययोजनासहित जिम्मेवारी तोकिने उनले बताए। सभापति थापाले पार्टीका परम्परागत कार्यक्रमको शैली परिवर्तन गर्ने संकेतसमेत गरेका छन्। हलभित्र सोफामा बसेर ताली बजाउने र औपचारिक शुभकामना आदानप्रदान गर्ने कार्यक्रम नगर्ने घोषणा गर्दै उनले सरसफाइ, विपन्नलाई सहयोग तथा समुदायसँग प्रत्यक्ष जोडिने रचनात्मक कार्यक्रम भएमा मात्रै सहभागी हुन निर्देशन दिएका छन्।