छठ पर्वअन्तर्गत आज खरना, बजारमा सामग्री किन्नेको घुइँचो (फोटो फिचर)

जनकपुरधाम। लोकआस्थाको महापर्व छठअन्तर्गत आज खरना विधि गरिँदै छ । यस अवसरमा व्रतालुहरू दिनभरि उपवास बसेर साँझ चन्द्रमाको दर्शनपछि खरना पूजा गर्ने गर्छन् । खरनाका दिन माटोको नयाँ चुलोमा माटोकै नयाँ भाँडो प्रयोग गरी सख्खर, दूध र गम्हरीको चामलबाट खीर पकाइन्छ । गम्हरीको चामल उपलब्ध नभए धानको चामल प्रयोग गरिन्छ । साँझ खीरलाई नैवेद्यका रूपमा छठीमातालाई अर्पण गरेपछि व्रतालुहरूले प्रसाद ग्रहण गर्छन् । नैवेद्य चढाउने क्रममा अर्घदान गरिने स्थानअनुसार केराको पातमा खीर, दूध, केरा, मूला, पान र सुपारीलगायत सामग्री राखेर छठीमातालाई अर्पण गरिन्छ । नैवेद्य चढाइसकेपछि व्रतालु र परिवारका सदस्यले प्रसाद ग्रहण गर्ने परम्परा छ । छठ पर्व नजिकिएसँगै जनकपुरधामसहित तराई–मधेशका विभिन्न बजारमा किनमेल गर्नेहरूको घुइँचो लागेको छ । पर्वका लागि आवश्यक पूजा सामग्री खरिद गर्न बजारमा सर्वसाधारणको भीड बढेको हो । छठ पूजामा प्रयोग हुने डोम समुदायले बनाएका ढाकी, नाङ्लो, कोनियाँ र डगरीका साथै उखु, केरा, बेसार, अदुवा, निम्बु, मूला, नरिवल, पान, सुपारी तथा विभिन्न फलफूल किन्नेको चहलपहल बढेको छ । त्यस्तै, माटोका हात्ती, ढकनी, घैँला, नयाँ व्रतालुका लागि नयाँ कपडा र घाट सजाउन आवश्यक सामग्रीको पनि माग बढेको छ । विशेषगरी किराना बजारमा किनमेल गर्नेहरूको भीड देखिएको छ । कृषिमा आधारित पर्वका रूपमा समेत चिनिने छठमा केरा, उखु र अदुवालगायत कृषि उपजको विशेष महत्त्व रहेकाले ती सामग्री खरिद गर्न बजारमा उपभोक्ताको चाप बढेको छ । सबै तस्बिर: वीरेन्द्र रमण