चाडपर्वमा आगलागी नियन्त्रण गर्न काठमाडौं महानगरको तयारी, सूचना आएको एक मिनेटमै दमकल परिचालन

दशैं, तिहारलगायतका चाडपर्वमा हुन सक्ने आगलागी तथा अन्य विपद्का घटनालाई नियन्त्रण गर्न काठमाडौं महानगरपालिकाले सुरक्षा व्यवस्थालाई चुस्त बनाएको छ । सम्भावित जोखिमलाई मध्यनजर गर्दै महानगरपालिकाले दमकल, विपद् व्यवस्थापनका उपकरण तथा जनशक्तिलाई तयारी अवस्थामा राखेको जनाएको छ । काठमाडौं महानगरपालिकाको विपद् व्यवस्थापन विभागअन्तर्गतको वारुण यन्त्र कार्यालयले हाल तीनवटा स्थानबाट सेवा सञ्चालन गरिरहेको छ । आगलागी वा अन्य विपद्को सूचना प्राप्त हुनासाथ एक मिनेटभित्रै प्रतिकार्यका लागि टोली परिचालन हुने व्यवस्था मिलाइएको महानगरले जनाएको छ । त्यस्तै, उपत्यकाका विभिन्न स्थानमा हुने आगलागी तथा विपद्का घटनास्थलमा पाँच मिनेटभित्र पुग्ने लक्ष्यसहित तयारी गरिएको छ । महानगरका फायर कमाण्डर तथा नगर प्रहरी वरिष्ठ नायब निरीक्षक नरेशराज कुँवरका अनुसार तीनवटै स्टेसनमा दमकल, आवश्यक उपकरण र जनशक्तिलाई तत्काल परिचालन गर्न सकिने गरी तयारी अवस्थामा राखिएको छ । आवश्यक परेको अवस्थामा ६ देखि ७ वटासम्म दमकल र तिनका लागि आवश्यक जनशक्ति परिचालन गर्न सकिने उनले बताए । कुँवरले आगलागी भएको स्थान र दमकल स्टेसनबीचको दूरीअनुसार घटनास्थलमा पुग्ने समय फरक पर्न सक्ने भए पनि सूचना प्राप्त हुनासाथ टोली परिचालन हुने व्यवस्था मिलाइएको स्पष्ट पारे । उनले भने, ‘नागरिकको सुरक्षालाई उच्च प्राथमिकता दिन दशैं, तिहारलगायतका चाडपर्वमा सोहीअनुसार ड्युटी व्यवस्थापन गरेका छौँ । आवश्यक परेको खण्डमा तीनवटै स्थानमा रहेका विपद् व्यवस्थापनका जनशक्ति र वारुण यन्त्रका उपकरण तत्काल परिचालन गर्न सकिने गरी तयारी अवस्थामा राखेका छौँ । आगलागी वा अन्य विपद्को सूचना प्राप्त हुनासाथ प्रतिकार्यका लागि एक मिनेटभित्र कार्यालयबाट निस्किसक्ने व्यवस्था मिलाएका छौँ ।’ चाडपर्वका समयमा घर, पसल तथा सार्वजनिक स्थानमा ग्यास, विद्युतीय बत्ती, दियो तथा अन्य विद्युतीय उपकरणको प्रयोग बढ्ने भएकाले आगलागीको जोखिमसमेत बढ्ने कुँवरले बताए । उनका अनुसार दशैंमा खाना पकाउन ग्यासको प्रयोग बढी हुने भएकाले ग्यास चुहावटबाट आगलागी हुन सक्ने जोखिम रहन्छ भने तिहारमा विद्युतीय बत्ती तथा उपकरणको असुरक्षित प्रयोगले आगलागी निम्त्याउन सक्छ । सम्भावित दुर्घटना न्यूनीकरणका लागि महानगरपालिकाले समुदायस्तरमा आगलागी नियन्त्रण तथा सुरक्षात्मक उपायबारे जनचेतनामूलक कार्यक्रमसमेत सञ्चालन गरिसकेको उनले जानकारी दिए । ‘दशैं, तिहारमा बढीभन्दा बढी विद्युतीय उपकरण, बत्ती र दियो प्रयोग गरिन्छ । त्यसैले दशैंमा ग्यासबाट तथा तिहारमा विद्युतीय उपकरणबाट आगलागी हुने जोखिम बढी हुन्छ । तिहारमा बत्ती तथा विद्युतीय उपकरण प्रयोग गर्दा सुरक्षित तरिका अपनाउन सबैलाई सुझाव दिन चाहन्छु,’ कुँवरले भने । उनले खाना पकाउँदा ग्यास चुहावट भए–नभएको जाँच गर्न, ग्यास प्रयोगमा सावधानी अपनाउन तथा विद्युतीय बत्ती जडान र सञ्चालन गर्दा सुरक्षित विधि अवलम्बन गर्न सर्वसाधारणलाई आग्रह गरे । महानगरपालिकाले आगलागी नियन्त्रणका लागि आवश्यक जनशक्तिको व्यवस्था गरिएको पनि जनाएको छ । कुँवरका अनुसार महानगरले हाल २१ जना अग्निनियन्त्रक नियुक्त गरेको छ । उनले विपद् व्यवस्थापनका लागि जनशक्ति तथा उपकरण तयारी अवस्थामा रहेकाले चाडपर्वमा सम्भावित आगलागीका घटनाको तत्काल प्रतिकार्य गर्ने गरी व्यवस्था मिलाइएको बताए । महानगरपालिकाले चाडपर्वलाई सुरक्षित बनाउन सर्वसाधारणलाई सावधानी अपनाउन र आगलागीको जोखिम बढाउने गतिविधिबाट बच्नसमेत आग्रह गरेको छ ।