गड्डाचौकी नाकामा ‘अल्फा’ले समात्यो लागुऔषध, युवक नियन्त्रणमा

कञ्चनपुर । कञ्चनपुरको गड्डाचौकी नाकामा सशस्त्र प्रहरीको तालिमप्राप्त कुकुर ‘अल्फा’ले मुखभित्र लुकाएर ल्याइएको खैरो हेरोइन फेला पारेको छ। आइतबार भीमदत्त नगरपालिका–१० स्थित भन्सार बेरियलमा चेकजाँच गर्ने क्रममा कैलालीको घोडाघोडी नगरपालिका–६, अस्नेहराका २४ वर्षीय विक्रम मिजारको मुखभित्र लुकाइएको अवस्थामा ०.१६ ग्राम खैरो हेरोइन बरामद भएको हो। सशस्त्र प्रहरी बल नेपालको सीमा सुरक्षा गुल्म गड्डाचौकीबाट खटिएको टोलीले ‘अल्फा’ नामको तालिमप्राप्त लेब्राडोर कुकुरको सहयोगमा चेकजाँच गर्दा मिजारको मुखभित्र लुकाइएको अवस्थामा लागुऔषध फेला पारेको जनाएको छ। लागुऔषध लुकाएर सीमा नाका पार गर्ने प्रयास गरेको आशंकामा मिजारलाई नियन्त्रणमा लिइएको सशस्त्र प्रहरीले जनाएको छ। बरामद लागुऔषधसहित मिजारलाई थप अनुसन्धान तथा आवश्यक कानुनी कारबाहीका लागि जिल्ला प्रहरी कार्यालय कञ्चनपुरमा बुझाइएको छ।