काठमाडौँको तापक्रम ८ डिग्रीमा झर्यो, चिसो बढ्दै

काठमाडौं। काठमाडौँ उपत्यकामा दिनप्रतिदिन चिसो बढ्दै गएको छ। बिहीबार बिहानको मापनअनुसार उपत्यकाको न्यूनतम तापक्रम ८ डिग्री सेल्सियसमा झरेको छ। मौसम पूर्वानुमान महाशाखाका मौसमविद् डेभिड ढकालका अनुसार बिहान ५:४५ बजे गरिएको प्रारम्भिक मापनमा तापक्रम ८ डिग्री सेल्सियस देखिएको हो। सूर्योदयसम्म न्यूनतम तापक्रम थप घट्न सक्ने सम्भावना रहेको उनले बताए। महाशाखाले बिहान ५:४५ र ८:४५ बजे गरी दुई पटक न्यूनतम तापक्रम मापन गर्ने गर्दछ। बुधबार काठमाडौँको न्यूनतम तापक्रम १०.२ डिग्री सेल्सियस थियो। बुधबार काठमाडौँका विभिन्न स्थानमा वर्षा भएको थियो। मौसमविद् ढकालका अनुसार त्रिभुवन विमानस्थल क्षेत्रमा ३३.५ मिलिमिटर र बबरमहल क्षेत्रमा ११.२ मिलिमिटर वर्षा मापन गरिएको थियो। १० मिलिमिटरभन्दा बढी वर्षा हुनुलाई मध्यम वर्षा मानिन्छ। उपत्यकाका अन्य स्थानमा भने हल्का वर्षा भएको थियो। आज भने काठमाडौँमा पानी पर्ने सम्भावना नरहेको महाशाखाले जनाएको छ। मौसमविद् ढकालले आजको मौसम सामान्यतया घमाइलो रहने र कहिलेकाहीँ बादल देखिन सक्ने बताए। हाल काठमाडौँ उपत्यकासहित देशभर नै तापक्रम घट्ने क्रममा रहेको छ।