एनपीएलमा पाकिस्तानी खेलाडीको सहभागिता अनिश्चित

काठमाडौं। नेपाल प्रिमियर लिग (एनपीएल) मा पाकिस्तानी खेलाडीहरूको सहभागिता अनिश्चित बनेको छ। क्रिकइन्फोका अनुसार एनपीएलमा सहभागी हुने पाकिस्तानी खेलाडीहरूले नो अब्जेक्सन सर्टिफिकेट (एनओसी) प्राप्त गर्ने सम्बन्धमा समस्या देखिएको छ। यसअघि एनओसी पाइसकेका खेलाडीहरूलाई समेत प्रतियोगितामा सहभागी हुन रोक लगाइएको बताइएको छ। एनपीएलसँग सम्बन्धित स्रोतहरूले पाकिस्तान क्रिकेट बोर्ड (पीसीबी) ले एनओसी जारी गर्नका लागि प्रत्येक खेलाडीसँग २५ हजार अमेरिकी डलर माग गरेको दाबी गरेका छन्। यद्यपि, पीसीबीले आयोजकलाई लिखित रूपमा यस्तो शुल्क माग गरेको आधिकारिक पुष्टि हुन सकेको छैन। क्रिकइन्फोले यस विषयमा प्रतिक्रियाका लागि पीसीबीलाई सम्पर्क गरे पनि तत्काल कुनै जवाफ प्राप्त भएको छैन। प्रतियोगिता भोलि सोमबारदेखि सुरु हुँदै छ, जसमा आठ टोलीले प्रतिस्पर्धा गर्नेछन्। केही पाकिस्तानी खेलाडीहरू काठमाडौं आइपुगेका छन् भने अन्य खेलाडीहरूले समस्या समाधान नभएसम्म आफ्नो यात्रा स्थगित गरेका छन्। एनपीएलमा सहभागी हुन लागेका खेलाडीहरूमा साहिबजादा फरहान, हैदर अली, हुनैन शाह, हुसेन तलात, इफ्तिखार अहमद, हसन अली र उसामा मिर रहेका छन्। यी खेलाडीहरू हाल पाकिस्तानको कुनै पनि एकदिवसीय वा टेस्ट टोलीमा समावेश छैनन्। यस वर्ष पीसीबीले रातो बल र सेतो बलको क्रिकेटका लागि नयाँ केन्द्रीय सम्झौता संरचना घोषणा गरेको थियो। यसअन्तर्गत टी-२० विशेषज्ञ मानिने खेलाडीहरूलाई अन्तर्राष्ट्रिय जिम्मेवारीसँग मिति नजुध्ने अवस्थामा विदेशी लिग खेल्ने स्वतन्त्रता दिने व्यवस्था थियो। तर, पीसीबीले कुन खेलाडी कुन श्रेणीमा पर्छन् भन्ने सार्वजनिक गरेको छैन र नयाँ सम्झौता पूर्ण रूपमा कार्यान्वयनमा आएको छ वा छैन भन्ने स्पष्ट छैन।