एनपीएलको स्वास्थ्य साझेदार बन्यो आर्य फार्माल्याब, तीन वर्षका लागि सम्झौता

काठमाडौं । आर्य फार्माल्याबले नेपाल प्रिमियर लिग (एनपीएल) को स्वास्थ्य साझेदारका रूपमा तीन वर्ष सहकार्य गर्ने भएको छ। स्थापनाको ३०औँ वर्षमा प्रवेश गरेको अवसरमा कम्पनीले नेपाल क्रिकेट संघ (क्यान)सँग सम्झौता गरेको हो। क्रिकेटमार्फत स्वास्थ्य सचेतना फैलाउने उद्देश्यले सहकार्य गरिएको कम्पनीले जनाएको छ। यसअन्तर्गत दर्शकलाई आधारभूत स्वास्थ्य परीक्षण, परामर्श र स्वस्थ जीवनशैलीबारे जानकारी दिने लक्ष्य राखिएको छ। कम्पनीका अनुसार एनपीएलका खेल हुने त्रिभुवन विश्वविद्यालय अन्तर्राष्ट्रिय क्रिकेट मैदानमा स्वास्थ्य परीक्षण तथा परामर्श कक्ष सञ्चालन भइरहेको छ। त्यहाँ स्वास्थ्य सचेतनासँगै मनोरञ्जन र खेलकुदसम्बन्धी गतिविधि पनि सञ्चालन गरिएका छन्। आर्य फार्माल्याबले प्रत्येक खेलमा दुई खेलाडीलाई ‘हेल्दी पार्टनरसिप अवार्ड’ प्रदान गर्ने भएको छ। यो पुरस्कार पाउने खेलाडीले जनही २५ हजार रुपैयाँ प्राप्त गर्नेछन्। खेलाडीको उत्कृष्ट प्रदर्शन र खेल भावनालाई प्रोत्साहन गर्न पुरस्कारको व्यवस्था गरिएको कम्पनीले जनाएको छ। यस्तै, प्रत्येक खेलमा एक जना दर्शकलाई ‘हार्टबिट मुमेन्ट अफ द म्याच’ अन्तर्गत २० हजार रुपैयाँ पुरस्कार दिइनेछ। लोकप्रिय खेल क्रिकेटसँग जोडिएर धेरै नागरिकसम्म स्वास्थ्यसम्बन्धी सन्देश पुर्‍याउन सकिने कम्पनीको विश्वास छ।