एनपीएलका ६ विदेशी खेलाडी, जसले ठूला नामलाई छायामा पार्न सक्छन्

काठमाडौं। नेपाल प्रिमियर लिग (एनपीएल) को तेस्रो संस्करण भोलि कीर्तिपुरमा सुरु हुँदैछ। प्रतियोगितामा डेभिड वार्नर, डेभिड मिलर, आन्द्रे रसेल र शाकिब अल हसन जस्ता विश्व क्रिकेटका ठूला नामहरू सहभागी छन्। यद्यपि, टी-२० क्रिकेटमा नामभन्दा त्यस दिनको प्रदर्शनले नतिजा निर्धारण गर्ने भएकाले धेरै चर्चा नभएका तर खेलको दिशा बदल्न सक्ने ६ विदेशी खेलाडीमाथि सबैको नजर छ। कर्णाली याक्सका साहबजादा फर्हान पाकिस्तानका टी-२० कप्तान हुन्। ५१ अन्तर्राष्ट्रिय खेलमा १,५५४ रन बनाएका उनले पछिल्लो समय उत्कृष्ट लय देखाएका छन्। कीर्तिपुरको पिचमा पावरप्लेको सदुपयोग गर्दै उनले टोलीलाई बलियो सुरुवात दिलाउन सक्छन्। सुदूरपश्चिम रोयल्सका शेरफन रदरफोर्ड आक्रामक मध्यक्रमका ब्याटर हुन्। उनले २८३ टी-२० खेलमा ५,०९० रन बनाएका छन्। उनले स्पिनरविरुद्ध आक्रामक खेल्दै खेलको मध्यतिरै नतिजा आफ्नो पक्षमा पार्न सक्ने क्षमता राख्छन्। चितवन राइनोजका लेगस्पिनर उसामा मिर विकेट लिने मुख्य हतियार हुन्। पाकिस्तान सुपर लिगमा सर्वाधिक विकेट लिएका उनले गति र उडान परिवर्तन गर्दै ब्याटरलाई दबाबमा राख्छन्। पोखरा एभेन्जर्सका अफस्पिनर मेहदी हसन पावरप्लेमै बलिङ गर्न सक्ने क्षमताका कारण महत्त्वपूर्ण छन्। उनी आईसीसीको टी-२० बलिङ वरीयतामा आठौँ स्थानमा रहेका खेलाडी हुन्। लुम्बिनी लायन्सका डार्सी सर्ट कीर्तिपुरको मैदानसँग परिचित खेलाडी हुन्। अघिल्लो संस्करणमा उनले १० खेलमा २५६ रन बनाएका थिए। उनी टोलीलाई स्थिरता प्रदान गर्दै इनिङ्स अगाडि बढाउन माहिर छन्। काठमाडौं गोर्खाजका सहान आराच्चिगे मध्यक्रममा ब्याटिङ र अफस्पिन बलिङको सन्तुलन दिन सक्ने खेलाडी हुन्। उनले श्रीलंकाको लंका प्रिमियर लिगमा राम्रो प्रदर्शन गरेका छन्। यसपालि प्रत्येक टोलीमा आठ विदेशी खेलाडी रहे पनि एक खेलमा चार जनालाई मात्र खेलाउन पाइने नियम छ। त्यसैले यी खेलाडीहरूले प्लेइङ-११ मा स्थान बनाउन आफ्नो प्रदर्शनबाट टोलीलाई विश्वस्त पार्नुपर्नेछ।