इलन मस्कले अर्को वर्ष अमेरिकाका हरेक बालबालिकालाई स्पेसएक्सको एक सेयर दिने घोषणा

स्पेसएक्सका सीईओ इलन मस्कले अर्को वर्ष अमेरिकाका प्रत्येक बालबालिकालाई कम्पनीको आफ्नो एउटा सेयर दिने सोमबार घोषणा गरेका छन्। अगस्टमा एसईसीमा बुझाइएको विवरण अनुसार, हाल मस्कसँग स्पेसएक्सका करिब ४.८ अर्ब सेयरहरू छन्। यदि ‘अनभेस्टेड अवार्ड’ (अझै हस्तान्तरण नभएका सेयरहरू) र ‘स्टक अप्सन’ हरूलाई पनि जोड्ने हो भने यो संख्या ६.४ अर्ब पुग्छ, जुन कम्पनीमा ४८.४ प्रतिशतको आर्थिक हिस्सेदारी बराबर हुन आउँछ। आधिकारिक जनगणना तथ्याङ्क अनुसार, १ जुलाई २०२५ सम्ममा अमेरिकामा १८ वर्ष मुनिका ७ करोड २० लाख (७२ मिलियन) बालबालिकाहरू थिए। सीएनबीसीको रिपोर्टअनुसार, शुक्रबारको बजार बन्द हुँदाको स्पेसएक्सको सेयर मूल्य १४६.०३ डलरलाई आधार मान्दा, सीईओ मस्कले करिब १०.५ अर्ब डलर बराबरको सेयर बाँड्ने देखिन्छ। मस्कले ‘एक्स’ मा एक पोस्ट गर्दै भने, “यो धेरैमध्येको पहिलो कदम हुनेछ।” यद्यपि, उनले यो सेयर वितरण प्रक्रिया कसरी अघि बढ्छ भन्नेबारे थप विवरण दिएका छैनन्। हालैका हप्ताहरूमा मस्कको आर्थिक सहयोग विशेष गरी राजनीतिक क्षेत्रमा गरिएको योगदानका कारण चर्चामा छ। टेस्लाका सीईओ मस्कले जुलाईयता रिपब्लिकन समूहहरूलाई २७ करोड ६० लाख डलरभन्दा बढी रकम दान गरेका छन्। यससँगै उनी २०२६ को मध्यावधि चुनावका लागि सबैभन्दा ठूलो ज्ञात दाता बनेका छन्। विश्वका सबैभन्दा धनी व्यक्ति मस्कले सेप्टेम्बर महिनामा ‘सिनेट लिडरसिप फन्ड’ मा १५ करोड ८० लाख डलर प्रदान गरे। यो रिपब्लिकन पार्टीको प्रमुख ‘सुपर पीएसी’ हो। उनले यो रकम टेक्सासस्थित एक सम्बद्ध ‘पीएसी’ मार्फत दिएका हुन्, जुन रिपब्लिकन नेता केन प्याक्सटनलाई समर्थन गर्न स्थापना गरिएको थियो। मस्कले दिएका ७ करोड ५० लाख डलर र ८ करोड ३० लाख डलरका दुईवटा योगदानहरू अहिलेसम्मकै सबैभन्दा ठूला राजनीतिक चन्दाहरूमध्ये पर्छन्। मस्कको यो घोषणा ‘एन्थ्रोपिक’ कम्पनीले आफ्नो ५ प्रतिशत सेयर एउटा नयाँ ‘सार्वजनिक हित कोष’ मा राख्ने योजना सार्वजनिक गरेलगत्तै आएको हो। कम्पनीको मूल्यांकन बढ्दै जाँदा यस कोषमा रहने हिस्सेदारी पनि बढ्न सक्छ। आइतबार ‘एक्स’ मा एन्थ्रोपिकले उक्त कोषबारे गरेको पोस्टको जवाफमा मस्कले लेखे, “म सेयरहरू सिधै जनतालाई दिने सुझाव दिन्छु।” उनले आफूले पनि त्यही गर्न लागेको बताए। शेयरधनीहरूको स्वीकृति प्राप्त भएमा, एन्थ्रोपिकको कोषले तत्कालै कम्पनीको ५ प्रतिशत शेयर छुट्याउनेछ। यसका साथै, कम्पनीको मूल्य तोकिएको आधारभूत विन्दु, जुन हालसम्म सार्वजनिक गरिएको छैन — भन्दा ५० प्रतिशतले वृद्धि हुँदा, सञ्चालक समितिले आफ्नो विवेक प्रयोग गरी थप २ प्रतिशत शेयर यस कोषमा थप्न सक्नेछ। The post इलन मस्कले अर्को वर्ष अमेरिकाका हरेक बालबालिकालाई स्पेसएक्सको एक सेयर दिने घोषणा appeared first on Technology Khabar.