इथियोपियाको ओरोमियामा ४० भन्दा बढीको हत्या

अदिस अबाबा । इथियोपियाको मध्यवर्ती ओरोमिया राज्यमा शनिबार अर्थोडक्स इसाई चर्च र गाउँहरूमा भएका आक्रमणमा ४० जनाभन्दा बढीको मृत्यु भएको स्थानीय बासिन्दा र एक पादरीले सोमबार एएफपीलाई बताएका छन् । इथियोपियाको सबैभन्दा ठूलो राज्य ओरोमिया लामो समयदेखि विद्रोही गतिविधि र जातीय तनावबाट प्रभावित छ । यहाँ सशस्त्र समूहहरूले सामाजिक विभाजन बढाउन धार्मिक पहिचानको प्रयोग गर्ने गरेका छन् । नाम सार्वजनिक नगर्ने सर्तमा एक स्थानीय बासिन्दाले टेलिफोनमार्फत एएफपीलाई बताएअनुसार, शिरका जिल्लाको चोले वडामा उनकी बहिनी र काकाको हत्या भएको छ भने उनका अन्य आफन्तलाई बन्धक बनाइएको छ । उनका अनुसार उक्त क्षेत्रमा ४४ जनाको मृत्यु भएको छ । अर्का स्थानीय बासिन्दाले भने मृतकको सङ्ख्या ५१ पुगेको बताउनुभएको छ । इथियोपियामा सञ्चारमाध्यमको पहुँचमा कडा प्रतिबन्ध रहेकाले यस्ता घटनाको स्वतन्त्र रूपमा पुष्टि गर्न कठिन छ । इथियोपिया मानव अधिकार आयोगले घटनाबारे आफूले निगरानी गरिरहेको जनाएको छ । पहिलो स्थानीय बासिन्दाले उक्त क्षेत्रमा धार्मिक तनाव उच्च रहेको बताउँदै समयमै सम्बोधन नगरिए स्थिति थप गम्भीर बन्न सक्ने चेतावनी दिए । प्रत्यक्षदर्शीहरूका अनुसार आक्रमणमा दुईवटा चर्चलाई निशाना बनाइएको थियो । आक्रमणमा परेका मानिसका धेरै घरसमेत ध्वस्त पारिएको एक प्रत्यक्षदर्शीले बताए । अफ्रिकाको सिङ आकारको क्षेत्रमा अवस्थित इथियोपिया लामो समयदेखि विभिन्न आन्तरिक द्वन्द्वबाट प्रभावित छ । गत महिना उत्तरी टिग्रे राज्यमा पनि भीषण लडाइँ भएको थियो । करिब चार करोड जनसङ्ख्या रहेको ओरोमिया राज्यमा मुस्लिम, प्रोटेस्टेन्ट र अर्थोडक्स इसाई समुदायका मानिसहरू बसोबास गर्छन् । यहाँको द्वन्द्वको मुख्य कारण राजनीतिक तथा जातीय प्रतिनिधित्वसम्बन्धी विवाद भए पनि सशस्त्र समूहहरूले मानिसलाई एकजुट गर्न धार्मिक पहिचानको प्रयोग गर्ने गरेका छन् । आक्रमणमा परेका चर्चमध्ये एकका डिकन (धार्मिक सेवक) ले मृतकको सङ्ख्या ४६ रहेको बताए । “यी दुःखद हत्याकाण्डबाट हामी स्तब्ध भएका छौँ । सुरक्षा व्यवस्था पुनः कायम गर्न हामी सरकारसँग तत्काल हस्तक्षेपको माग गर्दछौँ,” उनले भने ।