आज लक्ष्मीपूजा र कुकुर तिहार मनाइँदै

<img src="https://www.lumbinisanchar.com/wp-content/uploads/2026/11/file_0000000077c08211b20deec842e76ce1-400x220.png" alt=""/> <p>काठमाडौं । नेपालीहरूको दोस्रो ठूलो चाड तिहारअन्तर्गत आज कार्तिक २२ गते आइतबार देशभर लक्ष्मीपूजा र कुकुर तिहार मनाइँदैछ।</p> <p>तिहारको दोस्रो दिन कुकुर तिहार र तेस्रो दिन लक्ष्मीपूजा मनाउने परम्परा भए पनि यस वर्ष तिथिको घटबढका कारण दुवै पर्व एकै दिन परेको हो।</p> <p>कुकुरलाई यमराजको दूतका रूपमा मान्दै आज बिहानै कुकुरको पूजा गरी माला लगाइदिने, टीका लगाउने र मिठामिठा खानेकुरा खुवाउने चलन छ। कुकुरलाई आज्ञाकारी, रक्षक तथा मानिसको विश्वासिलो साथीका रूपमा समेत सम्मान गरिन्छ।</p> <p>आज साँझ घर, पसल तथा कार्यालयमा दीप, बत्ती र झिलिमिली बत्ती बालेर धनधान्यकी देवी लक्ष्मीको पूजा आराधना गरिन्छ। लक्ष्मीलाई प्रसन्न पार्न घरआँगन सफा गर्ने, ढोकादेखि पूजाकोठासम्म फूलमाला र रङ्गोलीले सजाउने तथा दीपावली गर्ने परम्परा छ।</p> <p>लक्ष्मीपूजाका दिन घरमा लक्ष्मीको बास होस् र धनसम्पत्ति तथा सुखसमृद्धि प्राप्त होस् भन्ने कामनासहित पूजा गरिन्छ। विशेषगरी व्यापारी तथा व्यवसायीले आफ्नो कारोबार स्थलमा लक्ष्मीको पूजा गरी नयाँ आर्थिक वर्षको हिसाबकिताबसमेत सुरु गर्ने चलन छ।</p> <p>तिहारलाई उज्यालो, फूल र आपसी सद्भावको पर्वका रूपमा मनाइन्छ। पाँच दिनसम्म मनाइने यस पर्वमा काग, कुकुर, गाई, गोरु र दाजुभाइ तथा दिदीबहिनीबीचको सम्बन्धलाई विशेष महत्त्व दिइन्छ।</p> <p>यस वर्ष कार्तिक २१ गते शनिबार काग तिहार परेको छ भने कार्तिक २२ गते आइतबार लक्ष्मीपूजा र कुकुर तिहार परेको छ। कार्तिक २३ गते गाईपूजा, २४ गते गोवर्द्धन पूजा तथा म्हः पूजा र २५ गते भाइटीका मनाइनेछ।</p>