अस्थायी मर्मतपछि दसैँका लागि बागलुङका सडक सञ्चालनमा

बागलुङ। बाढीपहिरोले क्षति पुर्‍याएका बागलुङका राष्ट्रिय राजमार्ग र ग्रामीण सडकहरू अस्थायी मर्मतपछि सञ्चालनमा आएका छन्। यसले दसैँ मनाउन घर फर्किने यात्रुहरूलाई सहज बनाएको छ। असोज ९ देखि ११ गतेसम्मको अविरल वर्षाका कारण मध्यपहाडी लोकमार्ग, कालीगण्डकी करिडोर र बागलुङ-बेनी सडक लगायतका पूर्वाधारमा ठूलो क्षति पुगेको थियो। सडक डिभिजन कार्यालय बागलुङका प्रमुख हरि सुवेदीका अनुसार मालढुङ्गा पुलको पहुँचमार्ग, मध्यपहाडी लोकमार्गको गलकोट र निसीखोला खण्ड मर्मतपछि यातायात पुनः सुचारु भएको छ। मालढुङ्गा पुलको पहुँचमार्ग १५ दिन र गलकोट-ताराखोला सडक १७ दिनपछि सञ्चालनमा आएका हुन्। निसीखोलाको कानाबगर र झिवाखोला क्षेत्रमा करिब ४०० मिटर सडक बगाएको स्थानमा डाइभर्सन निर्माण गरिएको छ। सडक डिभिजन कार्यालय अन्तर्गतका सडकमा मात्रै करिब रु. ३० करोडको क्षति भएको छ। पूर्वाधार विकास कार्यालय बागलुङका प्रमुख अनुप थापाका अनुसार प्रदेश सरकार अन्तर्गतका सडकमा करिब रु. २० करोडको क्षति भएको प्रारम्भिक अनुमान छ। सबैभन्दा बढी क्षति गलकोट-हरिचौर-ताराखोला सडकमा देखिएको छ, जहाँ आठ किलोमिटर खण्डमा दर्जनौँ स्थानमा पहिरो गएको थियो। स्थानीय तहले ग्रामीण सडकहरू मर्मत गरी सञ्चालनमा ल्याएका छन्। जिल्लाका विभिन्न सडकमा गरी कुल रु. ५० करोड बराबरको क्षति भएको प्रारम्भिक अनुमान गरिएको छ। हाल अस्थायी रूपमा कटिङ र फिलिङ गरेर यातायात सञ्चालन गरिए पनि दीर्घकालीन पुनर्निर्माणका लागि रु. एक अर्बभन्दा बढी खर्च लाग्ने अनुमान छ।