अमेरिकाबाट कुरियरमार्फत गाँजा तस्करी, त्रिभुवन विमानस्थलबाट दुई जना पक्राउ

काठमाडौं । अमेरिकाबाट कुरियरमार्फत पठाइएको एक किलोभन्दा बढी गाँजासहित प्रहरीले त्रिभुवन अन्तर्राष्ट्रिय विमानस्थलबाट दुई भारतीय नागरिकलाई पक्राउ गरेको छ। पक्राउ पर्नेमा भारतको गुजरातका २३ वर्षीय भंवर सिंह र ३३ वर्षीय वन्दित पटेल रहेका छन्। लागुऔषध नियन्त्रण ब्युरोका एसएसपी सुवास बोहराका अनुसार अमेरिकाबाट कुरियरमार्फत पठाइएको १ किलो ३३८ ग्राम गाँजा बरामद गरिएको हो। गत कात्तिक १० गते कागजात (डकुमेन्ट) को आवरणमा कुरियरमार्फत विमानस्थल हुँदै ल्याइएको गाँजा प्रहरीले कन्ट्रोल डेलिभरी विधिबाट बरामद गरेको एसएसपी बोहराले बताएका छन्। यो विधिमा शंकास्पद सामानको वास्तविक प्राप्तकर्ता वा त्यससँग सम्बन्धित व्यक्तिसम्म पुग्न निगरानीसहित सामानको डेलिभरी प्रक्रिया अघि बढाइन्छ। पक्राउ परेका दुवै भारतीय नागरिकमाथि लागुऔषध नियन्त्रण ब्युरोले थप अनुसन्धान गरिरहेको प्रहरीले जनाएको छ।