६.३ अर्ब डलरको साइबर चोरीपछि पनि आफ्नो आर्थिक अवस्था बलियो रहेको बाइनान्सको दाबी

विश्वकै ठूलो क्रिप्टोकरेन्सी एक्सचेन्ज बाइनान्सका सहप्रमुख कार्यकारी अधिकृत (सिइओ) रिचर्ड टेङले ६ अर्ब ३० करोड अमेरिकी डलरको साइबर चोरीपछि पनि कम्पनीको आर्थिक अवस्था निकै बलियो रहेको बताएका छन्। उनले गत साता भएको साइबर आक्रमणबारे विस्तृत समीक्षा प्रतिवेदन (पोस्टमार्टम) पनि केही समयपछि सार्वजनिक गरिने जानकारी दिएका छन्। मंगलबार हङकङ फिनटेक विक कार्यक्रममा बोल्दै टेङले बाइनान्समा प्रतिघण्टा हुने रकमको आगमन र निकासी सामान्य अवस्थामा फर्किएको बताए। उनका अनुसार साइबर आक्रमणबाट प्रभावित ९५ प्रतिशत टोकन पुनः पूर्ति गरिएको छ। उक्त आक्रमणलाई अहिलेसम्मकै ठूलो वित्तीय चोरीमध्ये एक मानिएको छ। रोयटर्सका अनुसार टेङले चोरीबाट भएको क्षति प्रयोगकर्ताका लागि सुरक्षित सम्पत्ति कोष (एसएएफयू) को आपत्कालीन सञ्चित रकम र कम्पनीले छुट्याएर राखेको अन्य कोषबाट बेहोरेको बताए। प्रभावित टोकनमध्ये बाँकी पाँच प्रतिशत कम तरलता भएका टोकन रहेको र तिनलाई पुनः पूर्ति गर्न बाइनान्सले ओभर-द-काउन्टर सेवा प्रदायकहरूसँग काम गरिरहेको उनले जानकारी दिए। “यो हाम्रा लागि पीडादायी पाठ हो। हामी यसको जिम्मेवारी लिन्छौँ,” उनले भने, “हामी यसबाट अझ बलियो भएर निस्कनेछौँ। प्रयोगकर्ताको रकम सुरक्षित छ र हामी निरन्तर अघि बढ्नेछौँ।” बाइनान्सका अनुसार सोमबारसम्म ग्राहकहरूले कम्पनीको प्लेटफर्मबाट कुल ४ अर्ब ७२ करोड अमेरिकी डलर बराबरको रकम झिकेका थिए। यो प्लेटफर्ममा रहेको कुल सम्पत्तिको करिब तीन प्रतिशत हो। विश्लेषकहरूले यसलाई तुलनात्मक रूपमा कम निकासी मानेका छन्। यसले ग्राहकको विश्वासमा ठूलो असर नपरेको संकेत गरेको उनीहरूको भनाइ छ। बाइनान्सका अनुसार अधिकांश निकासी टेथरको यूएसडीटी स्टेबलक्वाइनमा भएको थियो। “कम्पनीको आर्थिक अवस्था निकै बलियो छ। हामी यो क्षति बेहोर्न सक्षम छौँ र त्यसो गर्न सक्छौँ,” टेङले भने। अमेरिकी संघीय अनुसन्धान ब्युरो (एफबीआई) ले गत सप्ताहान्त ६ अर्ब अमेरिकी डलरभन्दा बढी मूल्यका क्रिप्टो सम्पत्ति चोरीमा उत्तर कोरिया जिम्मेवार रहेको जनाएको थियो। उक्त घटनाले क्रिप्टोकरेन्सी उद्योगमा ठूलो हलचल ल्याएको थियो। उत्तर कोरियाले भने यी आरोपलाई “बेतुकका अभिव्यक्ति” भन्दै अस्वीकार गरेको छ। ब्लकचेन अभिलेखअनुसार चोरीको अधिकांश घटना बिहीबार २००० जीएमटीपछि सुरु भएर करिब २० मिनेटभित्रै भएको थियो। बाइनान्सका अनुसार विश्वभर उसका ३३ करोड ५० लाखभन्दा बढी प्रयोगकर्ता छन्। डिजिटल सम्पत्ति र डेरिभेटिभ कारोबारमा कम्पनीको दैनिक औसत कारोबार मात्रा ९५ अर्ब अमेरिकी डलर रहेको छ। The post ६.३ अर्ब डलरको साइबर चोरीपछि पनि आफ्नो आर्थिक अवस्था बलियो रहेको बाइनान्सको दाबी appeared first on Technology Khabar.