काठमाडौं । शिक्षा तथा खेलकुदमन्त्री सस्मित पोखरेलले त्रिभुवन विश्वविद्यालय (त्रिवि) को काठमाडौं उपत्यकाभित्र रहेको करिब ७०५ रोपनी जग्गा फिर्ता ल्याइएको बताएका छन्। मन्त्री पोखरेलले बुधबार सामाजिक सञ्जाल फेसबुकमार्फत मन्त्रालयको पहलमा ६ महिनाको अवधिमा उक्त जग्गा फिर्ता ल्याउन सफल भएको जानकारी दिएका हुन्। मन्त्रालयको जिम्मेवारी सम्हालेकै दिनदेखि त्रिविको गुमेको गरिमा फर्काउन र विश्वविद्यालयको सम्पत्ति संरक्षण गर्न दृढ कदम चाल्ने संकल्प लिएको उनले बताएका छन्। वर्षौंदेखि ओझेलमा परेको र अव्यवस्थित बनेको त्रिविको जग्गा फिर्ता ल्याउने कामलाई उच्च प्राथमिकतामा राखिएको उनको भनाइ छ। मन्त्रालयको नेतृत्व सम्हालेपछि अतिक्रमित तथा अनधिकृत रूपमा प्रयोग भएका जग्गा खाली गराउन निर्देशन दिएको उनले उल्लेख गरेका छन्। सोहीअनुसार त्रिवि प्रशासनले सम्बन्धित पक्षलाई पत्राचार गरेको र निरन्तर समन्वय, प्रशासनिक पहल तथा दृढ इच्छाशक्तिका कारण ६ महिनामै करिब ७०५ रोपनी जग्गा फिर्ता ल्याउन सफल भएको उनले बताएका छन्। फिर्ता ल्याइएको जग्गा विश्वविद्यालयको शैक्षिक वातावरण सुधार, गुणस्तरीय शिक्षा प्रदान तथा अत्याधुनिक अनुसन्धान केन्द्र र शैक्षिक पूर्वाधार निर्माणमा उपयोग गरिने मन्त्री पोखरेलले बताएका छन्। उक्त जग्गा अब पूर्ण रूपमा त्रिविकै हितमा प्रयोग हुने उनको भनाइ छ।
६ महिनामै त्रिविको ७०५ रोपनी जग्गा फिर्ता ल्याएका छौं : मन्त्री पोखरेल
Read Complete Original Article
Published originally on केन्द्रबिन्दु
