४६औँ नेपालभाषा साहित्य तःमुंज्या सम्पन्न

भक्तपुर । भक्तपुरको यातामा आयोजित ४६औँ नेपालभाषा साहित्य तःमुंज्या (बृहत् साहित्य सम्मेलन) शनिबार साँझ सम्पन्न भएको छ । नेपाल संवत् ११४६ को अवसरमा ‘जनता म्वाःसा भाषा म्वाई’ अर्थात् ‘जनता बाँचे भाषा बाँच्छ’ भन्ने नारासहित शुक्रबारदेखि सुरु भएको सम्मेलनमा भाषा, साहित्य, कला, संस्कृति तथा समसामयिक सामाजिक र राजनीतिक विषयमा छलफल गरिएको थियो । समापन समारोहमा नेपाल मजदुर किसान पार्टीका अध्यक्ष नारायणमान बिजुक्छेँ (रोहित) ले राजनीतिमा सक्रिय व्यक्तिले समाजका समस्या बुझ्न अध्ययन, अनुसन्धान र व्यावहारिक अनुभवलाई प्राथमिकता दिनुपर्ने बताउनुभयो । राजनीतिक क्षमता पार्टी सदस्यताबाट मात्र पुष्टि नहुने उल्लेख गर्दै उहाँले व्यक्तिको ज्ञान, योग्यता र कार्यक्षमताका आधारमा मूल्याङ्कन गर्नुपर्ने धारणा व्यक्त गर्नुभयो । सम्मेलनका क्रममा किसान अगुवा मोहनबहादुर कुस्मा, लालाखिं गुरु आशालाल खायमली, समाजसेवी कृष्णदेवी वाङायो र सामाजिक अगुवा टेकबहादुर पलिखेललाई सम्मान गरिएको थियो । सम्मेलनको पहिलो दिन कवि दामोदर सुवाल, दयालक्ष्मी जोशी र ‘मुकुण्डो’ पुस्तकका लेखक वीणा जोशी सम्मानित हुनुभएको थियो । दुई दिनसम्म चलेको सम्मेलनमा नेपालभाषाका कविता, कथा तथा निबन्ध वाचन गरिएको थियो । यसका साथै प्रतियोगितात्मक साहित्यिक प्रस्तुति, नाटक, गीत, नृत्य र विविध सांस्कृतिक कार्यक्रमसमेत सञ्चालन गरिएका थिए । सम्मेलनका अवसरमा ‘तःमुंज्या’ स्मारिका पनि विमोचन गरिएको आयोजकले जनाएको छ । नेपाल संवत् ११०० अर्थात् विसं २०३७ देखि निरन्तर आयोजना हुँदैआएको तःमुंज्याले नेपालभाषा, साहित्य, कला, संस्कृति तथा सम्पदाको संरक्षण र प्रवर्द्धनमा योगदान पुर्‍याउँदै आएको छ । साथै, नयाँ पुस्तालाई साहित्य सिर्जना तथा सांस्कृतिक गतिविधिमा सहभागी हुन प्रेरित गर्ने उद्देश्यसमेत सम्मेलनले राख्दै आएको छ ।