काठमाडौं । नेकपा एमालेका सचिव महेश बस्नेतले आगामी स्थानीय तहको निर्वाचनमा आफ्नो पार्टी पहिलो बन्ने दाबी गरेका छन्। सोमबार एक कार्यक्रममा बोल्दै उनले पार्टीले विभिन्न कोणबाट आन्तरिक सर्वेक्षण गरिरहेको र त्यसको प्रारम्भिक अनुमानअनुसार एमाले पहिलो दल बन्ने बताए। उनले आगामी स्थानीय निर्वाचनमा एमाले पहिलो, नेपाली कांग्रेस दोस्रो, नेकपा तेस्रो र राष्ट्रिय स्वतन्त्र पार्टी चौथो स्थानमा रहने अनुमान गरिएको उल्लेख गरे। यसैगरी, बस्नेतले प्रधानमन्त्री बालेन शाह नेतृत्वको सरकारले जनभावना र नागरिकको अपेक्षाअनुसार काम नगरे सदनदेखि सडकसम्म आन्दोलन गर्ने चेतावनी दिएका छन्। सरकारलाई सही बाटोमा ल्याउन आफूहरू प्रयत्नशील रहने बताउँदै उनले सरकारले सुधारको बाटो नसमाते जनताले नै विकल्प खोज्ने दाबी गरे। सरकारले जनअपेक्षाअनुसार काम नगरे सदन, सडक र न्यायालयलगायत सबै निकायमा एमाले प्रभावकारी रूपमा उपस्थित हुने उनको भनाइ थियो। सरकारले आफूलाई सच्याएर अघि बढ्नुपर्ने भन्दै उनले त्यसो नगरे सरकारको विकल्प खोज्न जनताले अन्य उपाय अपनाउन सक्ने बताए। बस्नेतले २०८२ भदौ २३ र २४ गते भएको आन्दोलन हिंसात्मक र घातक बन्नुमा तत्कालीन गृहमन्त्री सुदन गुरुङलगायतको भूमिका रहेको आरोपसमेत लगाए। एमाले आन्दोलनलाई हिंसात्मक हुन नदिन सचेत रहेको उल्लेख गर्दै उनले सरकार पनि जिम्मेवार हुनुपर्नेमा जोड दिए।
स्थानीय निर्वाचनमा एमाले पहिलो पार्टी बन्ने महेश बस्नेतको दाबी

Read Complete Original Article
Published originally on केन्द्रबिन्दु






