सुरक्षा जोखिमका कारण रोकिएको विद्युतीय खरिद प्रणाली सञ्चालनमा

सुरक्षा जोखिमका कारण रोकिएको विद्युतीय खरिद प्रणाली (ई–जीपी) नयाँ संस्करणमार्फत पुनः सञ्चालनमा आएको छ । मंगलबार सार्वजनिक खरिद अनुगमन कार्यालयले सूचना जारी गर्दै प्रणाली पुनः सञ्चालनमा ल्याइएको जानकारी दिएको हो । कार्यालयले सार्वजनिक निकायलाई निर्माण कार्य तथा मालसामान खरिदका राष्ट्रिय र अन्तर्राष्ट्रियस्तरका बोलपत्र नयाँ प्रणालीमार्फत मात्रै प्रकाशन गर्न निर्देशन दिएको छ । यसअघि सञ्चालनमा रहेको विद्युतीय खरिद प्रणालीमा उच्च सुरक्षा जोखिम भेटिएपछि गत भदौ ११ गतेदेखि अर्को सूचना जारी नभएसम्मका लागि नयाँ बोलपत्र प्रकाशनको काम रोकिएको थियो । त्यसको विकल्पमा नयाँ सफ्टवेयर विकास गरी खरिद प्रक्रिया पुनः सञ्चालनमा ल्याइएको कार्यालयले जनाएको छ । नयाँ प्रणाली कार्यान्वयनसँगै सार्वजनिक निकाय, बोलपत्रदाता तथा आपूर्तिकर्ताले पुनः दर्ता गर्नुपर्ने व्यवस्था गरिएको छ । कार्यालयले नयाँ प्रणालीमा दर्ता हुन र सार्वजनिक खरिदका बोलपत्र यही प्रणालीमार्फत प्रकाशन गर्न आग्रह गरेको छ । कार्यालयले बोलपत्र प्रस्ताव तोकिएको समयभित्र अनलाइन वा सम्बन्धित कार्यालयमै हार्डकपीमध्ये कुनै एक माध्यमबाट पेस गर्न सकिने व्यवस्था मिलाउन पनि सार्वजनिक निकायलाई निर्देशन दिएको छ । बोलपत्र पेस गर्ने प्रक्रियामा अनलाइनसँगै हार्डकपीको विकल्पसमेत खुला राखिएको छ । तर, सार्वजनिक निकायले बोलपत्र खोल्ने तथा मूल्यांकन गर्ने काम भने विद्युतीय खरिद प्रणालीमार्फत नै गर्नुपर्नेछ । हार्डकपीमार्फत पेस भएका बोलपत्र प्रस्तावको विवरण अभिलेख मुचुल्का र मूल्यांकन प्रतिवेदनमा उल्लेख गर्नुपर्ने कार्यालयले जनाएको छ ।