साइबर सुरक्षा जोखिमपछि केही सरकारी वेबसाइट अस्थायी रूपमा बन्द

काठमाडौं । विश्वभर प्रचलित पीएचपी प्रविधिमा ‘पीएचपीटुसेल’ नामक गम्भीर साइबर सुरक्षा जोखिम देखिएपछि नेपालका केही सरकारी वेबसाइट तथा डिजिटल प्रणाली अस्थायी रूपमा बन्द गरिएका छन्। साइबर सुरक्षाका दृष्टिले गम्भीर मानिएका सिभिई–२०२६–१०९६१८ र सिभिई–२०२६–१०९६१९ नम्बरका यी सुरक्षा जोखिमलाई ९.२ अङ्कको सुरक्षा जोखिम मूल्याङ्कन स्कोरसहित ‘अति गम्भीर’ श्रेणीमा राखिएको जनाइएको छ। यी सुरक्षा कमजोरीको दुरुपयोग भएमा आक्रमणकारीले प्रयोगकर्ताको लगइन वा प्रणालीमा सामान्य पहुँचबिनै सर्भरमा टाढैबाट हानिकारक सङ्केत सञ्चालन गर्न सक्ने जोखिम हुन्छ। यसबाट सरकारी तथ्याङ्क चोरी हुने, अनधिकृत पहुँच स्थापित हुने तथा प्रणालीमा गम्भीर क्षति पुग्न सक्ने भएकाले जोखिमयुक्त प्रणालीलाई सावधानीस्वरूप अस्थायी रूपमा निष्क्रिय पारिएको हो। बडादसैँको सार्वजनिक बिदाका समयमा पनि सम्भावित जोखिम नियन्त्रण गर्न सफ्टवेयर विकास तथा सञ्चालन केन्द्रलगायत सम्बन्धित प्राविधिक टोली चौबीसै घण्टा खटिएका छन्। प्राविधिक टोलीले प्रभावित सर्भरमा सुरक्षा सुधारसम्बन्धी अद्यावधिक कार्यक्रम जडान गर्ने, सङ्केत प्रणालीलाई थप सुरक्षित बनाउने तथा प्राविधिक परीक्षण गर्ने काम अघि बढाइरहेका छन्। सुरक्षा परीक्षण पूरा गरी प्रणाली सुरक्षित रहेको सुनिश्चित भएपछि बन्द गरिएका सरकारी वेबसाइट तथा डिजिटल सेवाहरू क्रमशः पुनः सञ्चालनमा ल्याइने जनाइएको छ। साइबर सुरक्षा जोखिमका कारण सेवा अस्थायी रूपमा बन्द हुँदा सर्वसाधारण तथा सेवाग्राहीमा पर्न गएको असुविधाप्रति सम्बन्धित निकायले क्षमायाचना गर्दै धैर्य गर्न आग्रह गरेको छ। यसैबीच, प्राविधिक विज्ञहरूले सरकारी तथा निजी क्षेत्रका प्रणाली प्रशासकलाई आफ्ना पीएचपीमा आधारित वेब सर्भर तथा सम्बन्धित सफ्टवेयर तत्काल अद्यावधिक गर्न र आवश्यक सुरक्षा सतर्कता अपनाउन आग्रह गरेका छन्।