रवि लामिछानेलाई रक्षा बमको सुझाव– अब पार्टीले सुशासनको नारा नलगाउँदा हुन्छ

काठमाडौं । जेनजी अगुवा रक्षा बमले राष्ट्रिय स्वतन्त्र पार्टी (रास्वपा) का सभापति रवि लामिछानेलाई अब पार्टीले सुशासनको नारा लगाउन छाड्न सुझाव दिनुभएको छ । सामाजिक सञ्जालमार्फत आफ्नो धारणा सार्वजनिक गर्दै बमले सञ्चारमाध्यममाथि भइरहेका गतिविधि तथा पत्रकारमाथि प्रहरीले गरेको भनिएको दुर्व्यवहारप्रति आपत्ति जनाउनुभएको हो । ‘रवि लामिछानेजी, अब तपाईंको पार्टीले सुशासनको नारा नलगाउँदा हुन्छ। तपाईंको पार्टीले नेतृत्व गरेको सरकारबाट पञ्चायती गन्ध आइरहेको छ। कहिले मिडिया हाउसअगाडि आफ्नै कार्यकर्ता लगाएर गाडी तेर्स्याउने, कहिले मिडिया हाउसभित्रै छिरेर पत्रकार तर्साउने,’ उहाँले लेख्नुभएको छ । पत्रकारमाथि प्रहरीबाट भएको भनिएको घटनाबारे सरकारलाई नै जानकारी नभएको भन्ने अभिव्यक्तिप्रति पनि उहाँले प्रश्न उठाउनुभएको छ । ‘सरकारलाई थाहा छैन भने कसलाई थाहा हुन्छ, ओलीलाई कि लेखकलाई ?’ उहाँले प्रश्न गर्नुभएको छ । बमले सुरक्षा निकायबीच समन्वयको अभाव रहेको टिप्पणी गर्दै राज्यका विभिन्न संयन्त्रबीच विश्वास र सहकार्य हुनुपर्नेमा शक्ति संघर्ष देखिएको बताउनुभएको छ ।