भोटेकोशी बाढी प्रभावित बालबालिकालाई दीर्घकालीन संरक्षण तथा सहयोगका लागि आवेदन माग

काठमाडौं । राष्ट्रिय बाल अधिकार परिषद्ले रसुवा–भोटेकोशी बाढीबाट प्रभावित बालबालिकाको दीर्घकालीन संरक्षण, हेरचाह, शिक्षा, स्वास्थ्य तथा पुनःएकीकरणका लागि सहयोग उपलब्ध गराउने भएको छ । परिषद्ले ‘विपद् प्रभावित बालबालिकाको दीर्घकालीन संरक्षण, हेरचाह तथा स्याहार योजना, २०८३’ कार्यान्वयनमा ल्याउँदै सहयोगका लागि आवेदन माग गरेको छ । योजनाअन्तर्गत बाढी प्रभावित क्षेत्रमा बसोबास गर्ने १८ वर्षमुनिका बालबालिका लक्षित छन् । विशेषगरी बाढीका कारण दुवै अभिभावक गुमाएका वा सम्पर्कविहीन भएका, एक अभिभावक गुमाएर उच्च जोखिममा रहेका, परिवारबाट छुट्टिएका, अपाङ्गता भएका तथा थप संरक्षण आवश्यक पर्ने बालबालिकालाई प्राथमिकता दिइनेछ । परिषद्ले प्रभावित बालबालिकालाई परिवारमा आधारित हेरचाह, सुरक्षित आवास, दैनिक उपभोग्य सामग्री, खाद्यान्न तथा पोषण, विद्यालय भर्ना र शिक्षाको निरन्तरता, पाठ्यपुस्तक, पोसाक, यातायात, स्वास्थ्य परीक्षण तथा उपचार र मनोसामाजिक परामर्शलगायत सहयोग उपलब्ध गराउने जनाएको छ। स्वीकृत व्यक्तिगत दीर्घकालीन स्याहार योजनाका आधारमा प्रतिमहिना आर्थिक सहयोगसमेत उपलब्ध गराउन सकिनेछ । अन्य सरकारी वा गैरसरकारी निकायबाट छात्रवृत्ति वा सहयोग पाइरहेकालाई दोहोरो सुविधा भने दिइने छैन । सहयोग प्राप्त गर्ने बालबालिकाको परिवारले सुरक्षित वातावरणमा हेरचाह गर्नुपर्ने, बालविवाह हुन नदिने, जोखिमपूर्ण श्रममा नलगाउने, हिंसा तथा यौन दुर्व्यवहारबाट संरक्षण गर्ने र शिक्षाको निरन्तरता सुनिश्चित गर्नुपर्नेछ । बालबालिका तथा परिवारसम्बन्धी व्यक्तिगत विवरणको गोपनीयता कायम राख्नुपर्ने व्यवस्था पनि गरिएको छ । सहयोगका लागि बालबालिकाको जन्मदर्ता, बालबालिका तथा अभिभावकको परिचय खुल्ने कागजात, स्थानीय बाल अधिकार समितिको निर्णय तथा सिफारिस, विपद्बाट प्रभावित भएको प्रमाण, अभिभावक गुमाएको वा बेपत्ता भएको प्रमाण, अपाङ्गतासम्बन्धी प्रमाण र शैक्षिक तथा आर्थिक अवस्थासम्बन्धी विवरण पेस गर्नुपर्नेछ । सूचना प्रकाशित भएको मितिले ३५ दिनभित्र सम्बन्धित स्थानीय तहको वडा कार्यालयमार्फत आवेदन दिन सकिने राष्ट्रिय बाल अधिकार परिषद्ले जनाएको छ। The post भोटेकोशी बाढी प्रभावित बालबालिकालाई दीर्घकालीन संरक्षण तथा सहयोगका लागि आवेदन माग appeared first on Corporate Khabar : Nepals First Corporate News Magazine and Portal.