भूमिहीनलाई पुर्जा वितरण प्रक्रिया तीव्र

झापा। भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलको भ्रमणपछि झापामा भूमिहीनलाई जग्गाधनी पुर्जा वितरणको प्रक्रिया तीव्र पारिएको छ । जिल्ला भूमि समस्या समाधान समितिले पहिलो चरणमा तीन स्थानीय तहका दुई हजार ३३९ परिवारलाई पुर्जा वितरण गर्ने तयारी गरेको छ । समितिको आजको बैठकले बुद्धशान्ति, अर्जुनधारा र मेचीनगरबाट प्रमाणीकरण भई आएका भूमिहीन दलित, भूमिहीन सुकुम्बासी तथा अव्यवस्थित बसोबासी परिवारको नामावली सार्वजनिक गरेको हो । पहिलो चरणमा बुद्धशान्ति गाउँपालिकाका एक हजार ३६४, अर्जुनधारा नगरपालिकाका ९६४ र मेचीनगर नगरपालिकाका ११ परिवारको नामावली प्राप्त भएको समितिले जनाएको छ । एकैपटक दुई हजार ३३९ परिवारलाई जग्गाधनी पुर्जा वितरण गर्ने तयारी झापा जिल्लाकै इतिहासमा पहिलो महत्त्वपूर्ण घटना हुन सक्ने प्रमुख जिल्ला अधिकारी श्रवणकुमार पोखरेलले बताए । उनका अनुसार स्थानीय तहबाट थप नामावली प्रमाणीकरण भई आएपछि छानबिन गरेर दोस्रो चरणको सूचना प्रकाशन गरिनेछ । झापामा भूमिहीन दलिततर्फ दुई हजार ८९६, भूमिहीन सुकुम्बासीतर्फ १५ हजार ७८३ र अव्यवस्थित बसोबासीतर्फ ४१ हजार ८५१ गरी कुल ६० हजार ५७० परिवारले जग्गा प्राप्तिका लागि आवेदन दिएका छन् । यसबाहेक अघिल्ला आयोगका पालामा अधुरो तथा अपुरो अवस्थामा रहेका पाँच हजार २९६ परिवारका निवेदन छन् । केही दिनअघि झापा भ्रमणका क्रममा मन्त्री रावलले भूमिहीनलाई जग्गाधनी पुर्जा वितरणको काम तत्काल अघि बढाउन प्रमुख जिल्ला अधिकारी पोखरेललाई निर्देशन दिएकी थिइन् । सोही निर्देशनपछि पोखरेलले थप जनशक्ति परिचालन गरी पुर्जा वितरण प्रक्रियालाई तीव्रता दिएका छन् ।