बडादसैँले समाजमा एकता, आत्मीयता र सद्भाव अभिवृद्धि गरोस् : प्रधानमन्त्री शाह

काठमाडौं । प्रधानमन्त्री बालेन शाहले बडादसैँले नेपाली समाजमा एकता, आत्मीयता र सद्भाव अभिवृद्धि गर्ने बताएका छन्। दसैँको अवसरमा शुभकामना सन्देश जारी गर्दै उनले आर्थिक अभावका कारण दसैँजस्तो महान् पर्व कसैका लागि पनि बोझ बन्न नहुने बताएका हुन्। प्रधानमन्त्री शाहले देश तथा विदेशमा रहेका सम्पूर्ण नेपालीलाई बडादसैँको शुभकामना दिँदै यस पर्वले हरेक घरमा उत्साह, उमङ्ग र खुसी ल्याउने विश्वास व्यक्त गरेका छन्। विश्वभर छरिएर रहेका नेपाली समुदायलाई एकताबद्ध गर्ने पर्वका रूपमा दसैँको विशेष महत्त्व रहेको उनको भनाइ छ। धार्मिक, सामाजिक तथा सांस्कृतिक दृष्टिले महत्त्वपूर्ण दसैँले नेपाली समाजमा एकता, आत्मीयता र पारिवारिक सम्बन्धलाई मजबुत बनाउँदै आएको प्रधानमन्त्री शाहले उल्लेख गरेका छन्। ठूलाबाट टीका र जमरा ग्रहण गरी आशीर्वाद लिने परम्पराले सानालाई माया र ठूलालाई आदर गर्ने नेपाली मौलिक संस्कृतिलाई प्रतिबिम्बित गर्ने उनले बताएका छन्। दसैँ नेपालीहरूको सबैभन्दा चलायमान आर्थिक गतिविधि हुने पर्वसमेत रहेको उल्लेख गर्दै प्रधानमन्त्री शाहले आर्थिक सम्पन्नताले चाडपर्वको रौनक थपिने बताएका छन्। देशलाई आर्थिक समृद्धि र सुशासनको बाटोमा अघि बढाउन सरकार प्रतिबद्ध रहेको उनको भनाइ छ। यस वर्ष रसुवा, नुवाकोट र गोरखालगायतका स्थानमा भएका विनाशकारी घटनाको पीडा ताजै रहेका बेला दसैँ आएको उल्लेख गर्दै प्रधानमन्त्री शाहले मृतकप्रति श्रद्धाञ्जली तथा शोकसन्तप्त परिवारप्रति समवेदना व्यक्त गरेका छन्। उनले घाइतेहरूको शीघ्र स्वास्थ्यलाभको कामना गर्दै विपद्बाट विस्थापित नागरिकको पुनःस्थापनाका लागि सरकारले काम गरिरहेको जानकारी दिएका छन्। यसअघि भूकम्प, कोभिड महामारी र जेनजी आन्दोलनपछिको तनावपूर्ण परिस्थितिमा समेत नेपालीहरूले आफ्नो धार्मिक, सांस्कृतिक तथा सामाजिक परम्परालाई निरन्तरता दिएको स्मरण गर्दै उनले प्रतिकूल अवस्थामा पनि मौलिक संस्कृतिको संरक्षण हुँदै आएको बताएका छन्। प्रधानमन्त्री शाहले दसैँलाई असत्यमाथि सत्य र आसुरी प्रवृत्तिमाथि दैवी शक्तिको विजयको प्रतीकका रूपमा व्याख्या गरेका छन्। उनले प्रत्येक व्यक्तिले आफूभित्र रहेका नकारात्मक प्रवृत्तिलाई पहिचान गरी तिनमाथि विजय प्राप्त गर्नुपर्नेमा जोड दिएका छन्। काम, क्रोध, लोभ, ईर्ष्या र अहङ्कारजस्ता मानवीय दुःखका कारणमाथि विजय प्राप्त गर्न सके समाजमा सकारात्मक परिवर्तन ल्याउन सकिने उनको सन्देश छ। पछिल्लो समय गाउँघरका घरआँगन रित्तिँदै गएको तथा रोजगारी र जीविकोपार्जनका लागि लाखौँ नेपाली विदेशिन बाध्य भएको अवस्थाप्रति पनि प्रधानमन्त्री शाहले चिन्ता व्यक्त गरेका छन्। चाडपर्वमा परिवारसँग भेटघाट गर्ने चाहना हुँदाहुँदै पनि घर फर्कन नपाई विदेशमै बस्नुपर्ने नेपालीहरूको अवस्था बदल्न सामूहिक प्रयास आवश्यक रहेको उनले बताएका छन्। देशको समृद्धि र नागरिकको सुखद जीविकोपार्जनलाई सरकारले प्राथमिकतामा राखेको उल्लेख गर्दै प्रधानमन्त्री शाहले आर्थिक सम्पन्नता र सुशासनमार्फत नागरिकको जीवनस्तर सुधार गर्ने प्रतिबद्धता व्यक्त गरेका छन्। दसैँको मूल सन्देशलाई आत्मसात् गर्दै सत्य र सुशासनको मार्गमा अघि बढ्न माता दुर्गाभवानीबाट सबैलाई प्रेरणा मिलोस् भन्ने कामना गर्दै उनले सम्पूर्ण नेपालीमा आरोग्य, सुख, शान्ति र समृद्धिको शुभकामना दिएका छन्।