काठमाडौं । प्रोटोनको विद्युतीय एसयूभी ई.मास ७ ले मलेसियामा आयोजित एसेन एनक्याप ग्रान्ड प्रिक्स अवार्ड्स २०२६ मा सुरक्षा विधाअन्तर्गत अन्तर्राष्ट्रिय सम्मान प्राप्त गरेको छ । नोभेम्बर १० मा सम्पन्न अवार्ड समारोहमा ई.मास ७ ले ‘सेफ्टी असिस्ट’ विधामा सम्मान प्राप्त गरेको हो । यस उपलब्धिले गाडीमा उपलब्ध उन्नत चालक सहायता प्रविधि तथा सडक सुरक्षाप्रति प्रोटोनले दिएको प्राथमिकतालाई उजागर गरेको कम्पनीले जनाएको छ । ई.मास ७ मा विभिन्न सडक तथा ड्राइभिङ अवस्थालाई ध्यानमा राखेर तयार गरिएका सुरक्षा तथा चालक सहायता प्रणाली उपलब्ध छन् । यसको २०२६ मोडलमा इभेसिभ म्यानुभर असिस्ट, फ्रन्ट क्रस ट्राफिक अलर्ट र प्रिमियम भेरियन्टमा एक्टिभ लेन चेन्ज असिस्ट थप गरिएको छ । अन्तर्राष्ट्रिय सम्मान प्राप्त गरेको यस मोडलले मलेसियाको विद्युतीय सवारी बजारमा पनि राम्रो उपस्थिति कायम गरेको छ । सन् २०२६ को जनवरीदेखि अक्टोबरसम्म ई.मास ७ का ५ हजार ५७९ युनिट बिक्री भएका छन् । त्यसमध्ये अक्टोबरमा मात्रै ६१६ युनिट बिक्री भएको कम्पनीले जनाएको छ । सोही अवधिमा प्रोटोन ई.मासका सबै मोडल गरी कुल ३५ हजार ७३० युनिट बिक्री भएका छन् । नेपालमा प्रोटोन ई.मास ७ शंकर ग्रुपअन्तर्गतको जगदम्बा मोटर्समार्फत बिक्री हुँदै आएको छ । प्राइम र प्रिमियम गरी दुई भेरियन्टमा उपलब्ध यस विद्युतीय एसयूभीमा आधुनिक डिजाइन, प्रविधि र दैनिक प्रयोगलाई सहज बनाउने विभिन्न सुविधा समावेश छन् । गाडीमा सामान व्यवस्थित राख्न ३३ वटा स्टोरेज कम्पार्टमेन्ट उपलब्ध छन् । त्यस्तै, भेहिकल टु लोड (भीटुएल) प्रविधिमार्फत गाडीको ब्याट्रीबाट बाह्य विद्युतीय उपकरण सञ्चालन गर्न सकिन्छ । यसमा रहेको ७ एनएम इन्टेलिजेन्ट ककपिट चिपले भ्वाइस कन्ट्रोल तथा मनोरञ्जनसम्बन्धी सुविधालाई सहज बनाउने कम्पनीको भनाइ छ । ई.मास ७ को प्राइम भेरियन्टको मूल्य ४९ लाख ९९ हजार रुपैयाँ रहेको छ । यसमा ४९.५२ किलोवाट आवरको ब्याट्री उपलब्ध छ, जसले डब्लूएलटीपी मापदण्डअनुसार एकपटकको पूर्ण चार्जमा ३४५ किलोमिटरसम्म रेन्ज प्रदान गर्छ । त्यस्तै, ५९ लाख ९९ हजार रुपैयाँ मूल्य रहेको प्रिमियम भेरियन्टमा ६०.२२ किलोवाट आवरको ब्याट्री रहेको छ । यसले पूर्ण चार्जमा ४१० किलोमिटरसम्म रेन्ज दिने कम्पनीले जनाएको छ । दुवै भेरियन्टमा डीसी फास्ट चार्जिङ सुविधा उपलब्ध छ । यस प्रविधिको सहायताले करिब २० मिनेटमा ब्याट्री ३० प्रतिशतबाट ८० प्रतिशतसम्म चार्ज गर्न सकिने कम्पनीको दाबी छ । गाडीले ११ किलोवाटसम्मको एसी चार्जिङ र १०० किलोवाटसम्मको डीसी फास्ट चार्जिङ सपोर्ट गर्छ । अन्तर्राष्ट्रिय स्तरमा प्राप्त सुरक्षा सम्मान, उन्नत चालक सहायता प्रविधि र दैनिक प्रयोगका सुविधासहित ई.मास ७ ले नेपालको विस्तार हुँदै गएको विद्युतीय सवारी बजारमा आफ्नो उपस्थिति थप मजबुत बनाउने अपेक्षा कम्पनीले गरेको छ ।
प्रोटोन ई.मास ७ ले एसेन एनक्याप अवार्ड्स २०२६ मा सुरक्षा विधामा जित्यो अन्तर्राष्ट्रिय सम्मान

Read Complete Original Article
Published originally on हिमालय टाइम्स






