प्रहरीलाई प्रविधिमैत्री बनाउने नवनियुक्त आईजीपी केसीको घोषणा, गुनासो सुन्न छुट्टै संयन्त्र

नवनियुक्त प्रहरी महानिरीक्षक (आईजीपी) डा. मनोजकुमार केसीले नेपाल प्रहरीको नेतृत्व सम्हाल्दै अपराधका आधुनिक स्वरूपविरुद्ध कडा कदम चाल्ने प्रतिबद्धता जनाएका छन् । बुधबार दज्र्यानी चिह्न ग्रहण गरेपछि सम्बोधन गर्दै उनले साइबर अपराध, क्रिप्टो कारोबार र संगठित अपराधको चुनौती सामना गर्न प्रहरी संगठनलाई प्रविधिमैत्री र थप विशिष्टीकृत बनाउने उद्घोष गरेका हुन् । नवनियुक्त आईजीपी केसीले बदलिँदो सुरक्षा चुनौतीलाई मध्यनजर गर्दै प्रहरीको कार्यशैलीमा रूपान्तरण आवश्यक रहेको औँल्याए । उनले साइबर ठगी, डीपफेक, भ्रामक सूचना तथा खुला सीमानाका कारण उत्पन्न चुनौती नियन्त्रण गर्न गृह मन्त्रालयको समन्वयमा थप प्रभावकारी योजना अघि बढाउने बताए । संस्थागत सुदृढीकरणमा जोड दिँदै उनले प्रहरीभित्र तल्लो तहका कर्मचारीका गुनासा सम्बोधन गर्न सचिवालय मातहत रहने गरी विशेष गुनासो सुनुवाइ संयन्त्र तत्काल स्थापना गर्ने घोषणा गरे । सरुवा, बढुवा र व्यावसायिक निष्पक्षतामा सुधार गर्दै कनिष्ठ प्रहरी अधिकृतको मनोबल उकास्ने र वरिष्ठ अधिकृतलाई थप जवाफदेही बनाउने आफ्नो योजना रहेको उनले उल्लेख गरे । जलवायु परिवर्तन र प्राकृतिक विपद्को सामना गर्न प्रहरीको क्षमता अभिवृद्धि गर्ने बताउँदै उनले यसका लागि पर्याप्त स्रोतसाधन र कानुनी स्पष्टता आवश्यक रहेकोमा जोड दिए । विगतका द्वन्द्व, भूकम्प र कोभिड–१९ महामारीका बेला नेपाल प्रहरीले देखाएको वीरता र सेवाभावको स्मरण गर्दै उनले आगामी दिनमा नागरिकले प्रहरी देख्दा डर होइन, भरोसा गर्ने वातावरण सिर्जना गर्ने प्रतिबद्धता दोहोर्‍याए ।