प्रदीप पौडेलको चेतावनी- सरकारले आफ्ना गल्ती ढाकछोप गर्न सभापति थापाबारे अफवाह फैलायो, तर्सिंदैनौँ

नेपाली कांग्रेसका महामन्त्री प्रदीप पौडेलले सरकारले आफ्ना गल्ती तथा कमजोरी ढाकछोप गर्न सभापति गगनकुमार थापाबारे अफवाह फैलाएको आरोप लगाउँदै धम्की दिँदैमा कांग्रेस नतर्सिने बताएका छन् । बिहीबार पार्टी मुख्यालय सानेपामा पार्टी पदाधिकारी बैठकपछि सञ्चारकर्मीसँग कुरा गर्दै महामन्त्री पौडेलले बिचौलिया इनम सापकोटा र सभापति थापाबीच कुनै पनि प्रकारको चिनजान र लेनदेन नभएको स्पष्ट पारे । उनले बिचौलिया सापकोटा स्वयं प्रधानमन्त्रीको चुनावी प्रचारप्रसारमा हिँडेको दाबी गर्दै सरकारले कांग्रेस र सभापति थापामाथि लगाएको आरोप पुष्टि गर्न चुनौती दिए । ‘अहिले जुन ढंगबाट हाम्रो सभापतिको बारेमा चर्चा परिचर्चा चलेको छ, यो विषयान्तर गर्नको लागि अफवाह फैलाइएको हो । यसले हामीलाई कुनै पनि प्रकारको असर गर्दैन । हामी कुनै पनि हिसाबले तर्सिँदैनौँ,’ उनले भने । सभापति थापा र सापकोटाबीच कुनै चिनजान तथा सम्बन्ध नरहेको कुरा यसअघि नै पत्रकार सम्मेलनमार्फत जानकारी गराइसकेको उल्लेख गर्दै पौडेलले सापकोटा प्रधानमन्त्रीको चुनावी प्रचारप्रसारमा कहाँ–कहाँ गएको थियो भनेर प्रश्न गर्नुपर्ने बताए । सरकारले लगाएको आरोप पुष्टि गर्नुपर्नेमा जोड दिँदै उनले राज्यले कानुनअनुसार मर्यादामा बस्नुपर्ने बताए । ‘पहिले त सरकारले जे आरोप लगाइरहेको छ, त्यो पुष्टि गरोस् न । सरकारले मर्यादामा बस्नु पर्दैन ? कानुन कार्यान्वयन गर्नुपर्दैन ? यस्तो हुन्छ राज्य ?’ उनले प्रश्न गरे । पौडेलले निष्पक्ष रूपमा अनुसन्धान गर्न कांग्रेसले सरकारलाई सहयोग गर्ने बताए । तर, अनुसन्धानका नाममा जबरजस्ती धरपकड गर्न खोजिए प्रतिवाद गर्ने उनको चेतावनी थियो । ‘हामीले स्पष्टसँग भनेका छौँ, छानबिन गर्न रोक्दैनौँ, छानबिन गर्नुस् । पक्राउ नै किन गर्ने ? पक्राउ गर्नको लागि त कानुनी आधार होला नि । सरकारले तर्क गर्नुपर्‍यो, त्यसको आधारमा हामी सहमत वा असहमत हुने कुरा होला,’ उनले भने ।