नियोफिन हायर पर्चेज र क्यानबीच सहकार्य

काठमाडौं । नियोफिन हायर पर्चेज प्रालि, क्रिकेट एसोसिएसन अफ नेपाल (क्यान) र टिसिएम स्पोर्ट्स मार्केटिङ प्रालिबीच त्रिपक्षीय सम्झौता भएको छ । सम्झौताअनुसार नियोफिन हायर पर्चेज प्रालि आगामी तीन वर्षका लागि नेपाल प्रिमियर लिग (एनपिएल)अन्तर्गत सञ्चालन हुने ट्वेन्टी-२० क्रिकेट प्रतियोगिताको अफिसियल प्लाटिनम क्याप स्पोन्सर बनेको छ । प्रत्येक सिजनको प्रतियोगिता अवधिभर सबैभन्दा बढी रन बनाउने ब्याटरलाई दुई लाख रुपैयाँ नगद पुरस्कार राशिसहित नियोफिन लोगो अंकित क्याप प्रदान गरिनेछ । नेपाल प्रिमियर लिगको तेस्रो सिजनको टी-२० क्रिकेट प्रतियोगिता २०२६ अक्टोबर २६ देखि नोभेम्बर २१ सम्म त्रिवि अन्तर्राष्ट्रिय क्रिकेट रंगशाला कीर्तिपुरमा आयोजना हुँदैछ । नियोफिन हायर पर्चेज प्रालिका प्रमुख कार्यकारी अधिकृत राजेन्द्रप्रसाद तिम्सिनाले नेपालमा क्रिकेट सबै उमेर समूहबीचमा अत्यन्त लोकप्रिय खेलकुदका रूपमा स्थापित भइसकेको बताउनुभयो । उहाँले नेपाल प्रिमियर लिगजस्तो प्रतिष्ठित प्रतियोगितासँग साझेदारी गर्न पाउँदा गौरवान्वित रहेको भन्दै सबैभन्दा बढी रन बनाउने ब्याटरलाई प्रदान गरिने नियोफिन क्याप उत्कृष्टता, निरन्तरता र लगनशीलताको प्रतीक हुने बताउनुभयो । नियोफिन हायर पर्चेज प्रालि नेपाल राष्ट्र बैंकबाट इजाजत पत्रप्राप्त हायर पर्चेज कारोबार गर्ने गैरबैंकिङ वित्तीय संस्था हो, जुन केडिया अर्गनाइजेसनअन्तर्गत सञ्चालित छ । विगतमा बतास हायर पर्चेज प्रालिका नामबाट सञ्चालित कम्पनीले नयाँ ब्राण्ड पहिचानसहित नियोफिनका रूपमा सेवा विस्तार गरेको हो ।