काठमाडौं । नारायणगोपाल संगीत कोषले वरिष्ठ नृत्यकार भैरवबहादुर थापालाई विशेष सम्मान प्रदान गर्ने भएको छ । सम्मानस्वरूप थापालाई ५५ हजार ५५५ रुपैयाँ प्रदान गरिने कोषले जनाएको छ । स्वरसम्राट नारायणगोपालको ३६औं स्मृति दिवसका अवसरमा यही मंसिर १९ गते आयोजना हुने स्रष्टा सम्मान, पुरस्कार वितरण तथा सांगीतिक कार्यक्रममा थापालाई नृत्य विधातर्फ विशेष सम्मान प्रदान गर्न लागिएको हो । नेपाली वाङ्मय र कलाका विभिन्न विधालाई समेट्दै सांगीतिक क्षेत्रको समग्र योगदानको कदर गर्ने उद्देश्यले यसवर्ष नृत्य विधाका मूर्धन्य कलाकार थापालाई सम्मान गर्न लागिएको कोषले जनाएको छ । कोषका अध्यक्ष दीपक केसीद्वारा जारी विज्ञप्तिमा नेपाली कला तथा संस्कृतिको क्षेत्रमा थापाले पुर्याएको योगदानको कदरस्वरूप सम्मान प्रदान गर्ने निर्णय गरिएको उल्लेख छ । यसैगरी, यस वर्षको नारायणगोपाल संगीत सम्मान गायनतर्फ गायक प्रकाश श्रेष्ठ, संगीततर्फ संगीतकार भुपेन्द्र रायमाझी र गीत रचनातर्फ गीतकार प्रमोद ढुंगानालाई प्रदान गरिने भएको छ । तीनै विधाका सम्मानको राशि जनही ५१ हजार रुपैयाँ रहेको कोषका अध्यक्ष केसीले जानकारी दिनुभएको छ । नारायणगोपाल गुरुवाचार्य नेपाली संगीतका महान् गायकका रूपमा चिनिनुहुन्छ । स्वरसम्राट नारायण गोपालको जन्म विक्रम संवत १९९६ साल असोज १८ मा बाबु आशा गोपाल र आमा रामदेवी गुरुवाचार्यको कोखबाट काठमाडौंको किलगालमा भएको थियो । बीसको दशकको उत्तरार्धतिर रेडियो नेपालबाट माणिकरत्न स्थापित र प्रेमध्वज प्रधानको संगीतमा गीत गाएर स्वर परीक्षा पास गर्नुभएको थियो । ३० वर्ष लामो गायनयात्रामा उहाँले १३७ गीत गाएको संगीतका अध्येता प्रकाश सायमी बताउँनुहुन्छ । आधुनिक गीतका साथै उहाँले केही चलचित्रमा समेत गाउनुभएको छ । सांस्कृतिक संस्थानका महाप्रबन्धक रहँदा उहाँले बागीना (बाजा, गीत, नाच) नामक नेपालकै पहिलो सांगीतिक पत्रिका प्रकाशन गर्नुभएको थियो । नारायणगोपालले ‘श्रद्धाको फूल चढाइदिनु’, ‘दुईटा फूल देउरालीमा’, ‘बुझ्नै सकिनौ तिमीले’, ‘चिनारी हाम्रो धेरै पुरानो’, ‘अल्झेछ क्यारे पछ्यौरी तिम्रो’, आजै र राति के देखेँ सपना’,‘पोखिएर घामको झुल्का’, ‘तिम्रो जस्तो मुटु मेरो पनि’, ‘पर्खी बसेँ आउला भनी’, ‘एउटा मान्छेको मायाले कति’, ‘स्वर्गकी रानी मायाकी खानी’, ‘ए कान्छा ठट्टैमा यो बैस जान लाग्यो’, ‘सिरीमा सिरी नि कान्छा’ लगायत गीत आज पनि उत्तिकै लोकप्रिय छन् । नारायणगोपालको निधन २०४७ मंसिर १९ गते भएको थियो । गोरखा दक्षिण बाहु, चौथो, इन्द्रराज्यलक्ष्मी प्रज्ञा, छिन्नलता, जगदम्बाश्रीलागायत प्रतिष्ठित पुरस्कार पाउनुभएका उहाँलाई २०४८ सालमा मरणोपरान्त त्रिशक्तिपट्ट तेस्रो प्रदान गरिएको थियो । दार्जिलिङकी पेमला लामासँग विवाह गर्नुभएका नारायणगोपाल निःसन्तान रहनुभयो । पेमलाको पनि निधन भइसकेको छ ।
नारायणगोपाल स्मृति विशेष सम्मान र पुरस्कार घोषणा

Read Complete Original Article
Published originally on हिमालय टाइम्स






