देशको स्वाभिमानमा आँच पुर्‍याउने काम हुँदा टुलुटुलु हेरेर बस्न सक्दैनौँ : माधव नेपाल

काठमाडौं। नेपाली कम्युनिस्ट पार्टीका सहसंयोजक माधवकुमार नेपालले राष्ट्रिय हितमा आघात पुग्ने र देशको स्वाभिमानमा आँच आउने गतिविधि हुँदा टुलुटुलु हेरेर बस्न नसकिने बताएका छन्। पार्टीको दुईमहिने राष्ट्रिय जागरण अभियानको शुभारम्भ कार्यक्रममा बोल्दै नेपालले राष्ट्रियताबारे जनचेतना र जागरण अभिवृद्धि गर्न अभियान सञ्चालन गर्न लागिएको बताए। राष्ट्रियता, संविधानको रक्षा, लोकतान्त्रिक गणतन्त्रको संस्थागत विकास र जनजीविकाका सवाल पार्टीको प्राथमिकतामा रहेको उनको भनाइ छ। नेपालले जनताको त्याग, तपस्या र बलिदानबाट प्राप्त उपलब्धिको रक्षा गर्न संविधानको संरक्षण आवश्यक रहेको बताए। लोकतान्त्रिक गणतन्त्र, समावेशिता र विधिको शासनलाई संस्थागत गरेको संविधानको रक्षा गर्ने जिम्मेवारी राजनीतिक दलहरूको काँधमा रहेको उनले उल्लेख गरे। संविधान जनताको संघर्ष, मेहनत र योगदानबाट निर्माण भएकाले त्यसलाई कमजोर पार्ने प्रयास स्वीकार्य नहुने उनको भनाइ छ। संविधानको रक्षा र विधिको शासनप्रतिको प्रतिबद्धतालाई अभियानका क्रममा प्रमुखताका साथ उठाइने उनले बताए। नेपालले इतिहासमा खेलेको गौरवशाली भूमिकालाई बिर्सेर नयाँ इतिहास निर्माण गर्न नसकिने बताए। विगतका योगदानको सम्मान गर्दै वर्तमानका कमजोरीको समीक्षा गर्नुपर्ने उनको भनाइ छ। नयाँ भाष्यका नाममा विभिन्न विषयमा तथ्यहीन र गैरजिम्मेवार ढंगले चर्चा हुने गरेको उनले बताए। पार्टीहरूले आफ्ना कामका क्रममा भएका कमजोरीको समीक्षा गर्नुपर्ने उल्लेख गर्दै नेपालले गल्ती स्वीकार गरेर सुधार गर्दै अघि बढ्नुपर्ने बताए। राष्ट्रिय हितमा आघात पुग्ने र देशको स्वाभिमानमा आँच आउने कामलाई आफ्नो पार्टीले स्वीकार गर्न नसक्ने उनको भनाइ छ। उनले जनतामा राष्ट्रियताबारे चेतना जगाउन र जागरण पैदा गर्न अभियानमा राष्ट्रियताको मुद्दालाई उच्च महत्त्व दिइने बताए। जनताका समस्या सम्बोधन गर्ने, राष्ट्रियता र संविधानको रक्षा गर्ने तथा जनतासँगको सम्बन्धलाई बलियो बनाउने प्रतिबद्धतासमेत उनले व्यक्त गरे। न्युज एजेन्सी नेपाल