काठमाडौं । तिहारको समयमा काठमाडौं उपत्यकामा ७८ वटा सवारी दुर्घटना भएका छन् । उपत्यका ट्राफिक प्रहरी कार्यालयका अनुसार कात्तिक २१ गतेदेखि २५ गतेसम्मको अवधिमा उक्त दुर्घटना भएका हुन् । दुर्घटनामा परी पाँच जनाको मृत्यु भएको छ । उक्त अवधिमा मादक पदार्थ सेवन गरी सवारी चलाउने ५९५ जना र लागुऔषध सेवन गरी सवारी चलाउने १८ जना कारबाहीमा परेका छन् । ट्राफिक नियम उल्लङ्घन गर्ने कुल २ हजार २ सय २१ जनालाई कारबाही गरिएको उपत्यका ट्राफिक कार्यालयले जनाएको छ । उपत्यका ट्राफिक प्रहरी प्रवक्ता तथा प्रहरी उपरीक्षक (एसपी) नरेशराज सुवेदीका अनुसार तिहार अवधिमा भएका सवारी दुर्घटनाको मुख्य कारण तीव्र गति देखिएको छ । तीव्र गतिमा सवारीसाधन चलाउँदा चालकले नियन्त्रण गुमाउने र सवारी अनियन्त्रित भएर दुर्घटना हुने गरेको उनले बताए । उनका अनुसार तीव्र गतिमा सवारी चलाउने प्रवृत्ति दुर्घटनाको प्रमुख कारणका रूपमा देखिएको छ । चाडपर्वको समयमा सडकमा सवारीसाधनको चाप बढ्ने भएकाले चालकले गति नियन्त्रण गर्दै ट्राफिक नियमको पालना गर्नुपर्ने उनको भनाइ छ । ट्राफिक प्रहरीले सवारी दुर्घटना न्यूनीकरणका लागि तीव्र गति, मादक पदार्थ तथा लागुऔषध सेवन गरी सवारी चलाउने कार्य नियन्त्रणमा विशेष निगरानी गर्दै आएको छ ।
तिहारमा उपत्यकामा ७८ सवारी दुर्घटना, पाँच जनाको मृत्यु
Read Complete Original Article
Published originally on केन्द्रबिन्दु
