काठमाडौं । मंसिर ४ गतेदेखि प्रदर्शनमा आउने नेपाली फिल्म ‘जलाकी’ले चलचित्र जाँचपास समितिबाट युनिभर्सल सर्टिफिकेट पाएको छ। योसँगै फिल्म सबै उमेर समूहका दर्शकले हेर्न पाउने भएका छन्। ‘खुस्मा’ फेम्ड निर्देशक अशोक थापा मगरको निर्देशनमा बनेको ‘जलाकी’ उनको दोस्रो निर्देशकीय फिल्म हो। फिल्ममा उपासना सिंह ठकुरी र सोनम तोप्देन मुख्य भूमिकामा छन्। उनीहरूबीचको प्रेमकथालाई फिल्मको मुख्य विषयवस्तु बनाइएको निर्देशक मगरले बताएका छन्। मगर समुदायको संस्कार, संस्कृति र आस्थामा आधारित फिल्मले प्रेमकथामार्फत समुदायको मौलिक पहिचान र सांस्कृतिक पक्षलाई प्रस्तुत गर्ने निर्माण पक्षको भनाइ छ। फिल्मको ट्रेलरले दर्शकबाट सकारात्मक प्रतिक्रिया पाइरहेको निर्माण पक्षले जनाएको छ। यसका साथै फिल्ममा समावेश ‘कलेजीको छेऊ’, ‘चाँदी जलप’ र ‘जाले रुमाल मायालाई’ बोलका गीत पनि दर्शकमाझ लोकप्रिय बनेका छन्। फिल्ममा उपासना र सोनमसँगै शिल्पा मास्के, साहारा हाङ्मा लिम्बू, माओत्से गुरुङ, बुद्धि तामाङ, अस्तित्व भट्टचन, रजनी गुरुङ, राजु रेग्मी मगर, उषा खड्गी, खड्कबहादुर पुन (खबपु), लुनिभा तुलाधर, संगीता थापा, कर्मा लामा तामाङ, भावना मगर, राज काउचा मगर, दुइसाङ थिनलगायत कलाकारको अभिनय छ। विशेष भूमिकामा क्याप्टेन विजय लामा देखिनेछन्। बालकलाकारका रूपमा मुन्जन थापा मगर, नुलाम्मा बान्तावा र रिन्सी धनाहा मगरले अभिनय गरेका छन्। एम मिडिया प्रोडक्सनको ब्यानरमा निर्माण भएको फिल्मका निर्माता ओम घर्ती मगर, वीरबहादुर लामा, चन्द्रबहादुर भट्टचन, बेताने मगर (बबिता राना), मानबहादुर धनाहा मगर र सुस्मिता बुढाथोकी हुन्। फिल्मको वितरण गोविन्द शाहीको काफिया फिल्मस् र कुवेर सिने डिस्ट्रीब्युसनले गर्नेछन्।
‘जलाकी’लाई युनिभर्सल सर्टिफिकेट

Read Complete Original Article
Published originally on नेपालन्युज






