क्यान सचिव खड्का, म्याच रेफ्री र दुवै टोलीका कप्तानबीच छलफल

काठमाडौं । नेपाल प्रिमियर लिग (एनपीएल) अन्तर्गत सुदूरपश्चिम रोयल्स र विराटनगर किङ्ग्सबीचको खेल ५–५ ओभरमा हुने तय भए पनि टसमा ढिलाइ भएको छ। वर्षाले प्रभावित खेल सञ्चालन गर्न त्रिवि क्रिकेट मैदानका ग्राउन्ड स्टाफले निकै मेहनत गरेपछि मैदान खेलका लागि तयार पारिएको थियो। मैदान निरीक्षणपछि अम्पायरहरूले ५–५ ओभरको खेल सञ्चालन गर्ने निर्णय गरेका थिए। निर्धारित तालिकाअनुसार साँझ ७:२५ बजे टस र ७:४१ बजे खेल सुरु हुने भनिएको थियो। तर, राति ८:०५ बजेसम्म पनि टस हुन सकेको छैन। विराटनगर किङ्ग्सका कप्तान टसका लागि मैदानमा पुग्दा सुदूरपश्चिम रोयल्सका कप्तान दीपेन्द्रसिंह ऐरी भने उपस्थित हुनुभएन। उहाँ नेपाल क्रिकेट संघ (क्यान) का सचिव पारस खड्कासँग कुराकानी गर्न जानुभएको थियो। टसमा ढिलाइ भएपछि क्यान सचिव पारस खड्का, म्याच रेफ्री र दुवै टोलीका कप्तानबीच छलफल भइरहेको छ। खेलका लागि मैदानको रेडबुल जोनतर्फको बाउन्ड्री छोटो बनाइएको छ भने स्कोरबोर्डतर्फको दोस्रो विकेटमा खेल सञ्चालन गर्ने तयारी गरिएको छ।