‘करोडौं बुझाउने हैसियत छ र ?’

काठमाडौं।नेपाली कांग्रेसका वरिष्ठ उपसभापति विश्वप्रकाश शर्माले सभापति गगन थापाको नेतृत्व चयनमा १८ करोड रुपैयाँको आर्थिक लेनदेन भएको भन्ने प्रचारको खण्डन गरेका छन्। काभ्रेमा आयोजित अभिमुखीकरण कार्यक्रममा बोल्दै शर्माले प्रमाण बिना लगाइएका आरोपका पछि नलाग्न आग्रह गरे। विशेष महाधिवेशनबाट स्थापित नेतृत्व विधि, विधान र प्रक्रियाअनुसार चयन भएको उनको दाबी थियो। आर्थिक लेनदेनको आरोपप्रति व्यङ्ग्य गर्दै शर्माले आफू र गगन थापाको राजनीतिक पृष्ठभूमि स्मरण गराए। ‘नौ महिना स्वास्थ्यमन्त्री भएको गगन थापा र जिन्दगीमा मन्त्री नभएको, सांसद मात्रै बनेको विश्वप्रकाश शर्माले करोडौं–करोड बुझाउन सकौंला र ?’ उनले प्रश्न गरे। वर्षौंसम्म पटक–पटक सत्तामा बसेका नेताहरूको तुलनामा आफूहरू आर्थिक लेनदेन गर्न सक्ने अवस्थामा नरहेको उनको आशय थियो। शर्माले कसैले केही भन्यो भन्दैमा त्यसलाई प्रमाण मान्न नसकिने बताए। बैंक डकैतीमा पक्राउ परेको व्यक्तिले कुनै नेतालाई प्रधानमन्त्री बनाउन ५० करोड रुपैयाँ लेनदेन भएको दाबी गर्दैमा त्यसलाई सत्य मान्न नसकिने उदाहरण दिँदै उनले सामाजिक सञ्जालमा फैलिने अप्रमाणित प्रचारप्रति सचेत रहन आग्रह गरे। ‘कसैले केही भन्यो भन्दैमा त्यसलाई अदालत र कानुनले मान्छ कि मान्दैन ? सामाजिक सञ्जालमा त्यसकै पछि लाग्ने कि नलाग्ने ?’ शर्माले प्रश्न गरे।