एमालेमा असन्तुष्ट नेता कार्यकर्तालाई विद्रोह गर्न माधव नेपालको सुझाव

नेपाली कम्युनिस्ट पार्टी (नेकपा)का सहसंयोजक माधवकुमार नेपालले नेकपा एमालेमा असन्तुष्ट भएर बसिरहेका नेता तथा कार्यकर्तालाई विद्रोह गरेर एकता प्रक्रियामा आउन आह्वान गरेका छन् । मंगलबार काठमाडौंमा आयोजित नेपाली कम्युनिस्ट पार्टी र नेपाल कम्युनिस्ट पार्टीबीचको एकता घोषणा कार्यक्रममा बोल्दै नेपालले एमाले व्यक्ति विशेषले कब्जा गरेको टिप्पणी गर्दै उकुसमुकुस भएर बसिरहेका नेता–कार्यकर्तालाई नेकपासँगको एकता प्रक्रियामा सहभागी हुन आग्रह गरेका हुन् । उनले मुलुकका विद्यमान समस्या समाधानका लागि कम्युनिस्ट शक्तिहरू एकताबद्ध हुन आवश्यक रहेको भन्दै विभिन्न कम्युनिस्ट घटकमा रहेका नेता तथा कार्यकर्तालाई पनि एकतामा आउन आह्वान गरे । ‘एमालेमा विभिन्न हिसाबले उकुसमुकुसका साथ बसिरहेकाहरूलाई विद्रोह गरेर आउन भन्ने कि, सिंगै पार्टी लिएर आउन भन्ने ? यस अर्थमा त्यति मात्रै होइन, अरू थुप्रै घटकहरू हुनुहुन्छ,’ नेपालले भने, ‘मोहनविक्रम सिंहको नेतृत्वको होस्, चाहे मोहन वैद्यजीको नेतृत्व, नेत्रविक्रम चन्दजीलाई समेत म एकतामा आउन आह्वान गर्न चाहन्छु ।’ नेपालले नेत्रविक्रम चन्दसहितका नेताहरूसँग विगतमा समाजवादी मोर्चा निर्माण गरी देशव्यापी अभियान सञ्चालन गरिएको स्मरण गरे । उक्त अभियानमार्फत हजारौँ कार्यकर्ता आन्दोलनमा जोडिएको उनले बताए । उनले सहकार्यका लागि उपेन्द्र यादवसहितका अन्य राजनीतिक शक्तिलाई पनि आह्वान गरे । राष्ट्रियताको रक्षा, संविधानको संरक्षण, गणतन्त्र र समावेशीताको नीति जोगाउन तथा जनअधिकारको रक्षाका लागि सबै शक्तिबीच एकता र सहकार्य आवश्यक रहेको उनको भनाइ थियो । विश्वव्यापी रूपमा कम्युनिस्ट आन्दोलनप्रति देखिएको निराशा र विभिन्न देशमाथि भइरहेको अमेरिकी हस्तक्षेपले चुनौती बढाएको भन्दै नेपालले चिन्ता व्यक्त गरे । नेपाललाई पनि अमेरिकी रणनीतिक स्वार्थ पूरा गर्ने स्थानका रूपमा हेरिएको उनको दाबी थियो । उनले राष्ट्रिय स्वार्थको संरक्षण र राजनीतिक उपलब्धिको रक्षाका लागि कम्युनिस्टसहित अन्य राजनीतिक शक्तिबीच एकता र सहकार्य आवश्यक रहेको बताए ।