एनपीएलमा पहिलोपटक डीआरएस प्रविधि प्रयोग गरिने

काठमाडौं । नेपाल प्रिमियर लिग (एनपीएल) को तेस्रो संस्करणमा पहिलोपटक डिसिजन रिभ्यू सिस्टम (डीआरएस) प्रविधि प्रयोग गरिने भएको छ। नेपाल क्रिकेट संघ (क्यान) ले मंगलबार सामाजिक सञ्जालमार्फत प्रतियोगितामा डीआरएस लागू गरिने जानकारी दिएको हो। क्रिकेटमा अम्पायरले दिएको निर्णयप्रति असहमति भएमा खेलाडीले पुनरावलोकनको माग गर्न सक्ने व्यवस्था नै डीआरएस हो। अन्तर्राष्ट्रिय क्रिकेटमा व्यापक रूपमा प्रयोग हुँदै आएको यो प्रविधिले अम्पायरका निर्णयलाई प्राविधिक माध्यमबाट पुनः परीक्षण गर्न सहयोग पुर्‍याउँछ। क्यानका अनुसार एनपीएलमा एलबीडब्लू (लेग बिफोर विकेट) सम्बन्धी निर्णय पुनरावलोकनका लागि थ्रीडी बल ट्र्याकिङ प्रविधि प्रयोग गरिनेछ। यसका साथै रनआउट, स्टम्पिङ र नो बलसम्बन्धी निर्णयमा पनि रिभ्यूको व्यवस्था हुनेछ। प्रतियोगितामा कृत्रिम बुद्धिमत्ता (एआई) को सहायताले बल ब्याटमा लागेको वा नलागेको पत्ता लगाउने एज डिटेक्सन प्रविधिसमेत प्रयोग गरिनेछ। यसले बलले ब्याट छोएको अवस्थाको विश्लेषण गरी निर्णय प्रक्रियालाई थप विश्वसनीय बनाउन सहयोग गर्नेछ। त्यस्तै, बलको उचाइका आधारमा वाइडसम्बन्धी निर्णय परीक्षण गर्ने सुविधा पनि उपलब्ध हुनेछ। यसबाहेक छक्काको दूरी र उचाइ मापन गर्नुका साथै बलिङसम्बन्धी विभिन्न विश्लेषणात्मक तथ्यांक पनि उपलब्ध गराइने क्यानले जनाएको छ। एनपीएलमा डीआरएसको प्रयोगले अम्पायरका निर्णयमा शुद्धता बढाउनुका साथै खेलको प्रतिस्पर्धात्मकता र विश्वसनीयता अभिवृद्धि गर्ने अपेक्षा गरिएको छ।