असिनासहितको भारी वर्षाले त्रिभुवन विमानस्थल अस्तव्यस्त, धावनमार्गदेखि टर्मिनल भवनसम्म जलमग्न

काठमाडौं । बुधबार दिउँसो काठमाडौंमा अचानक परेको असिनासहितको भारी वर्षाले त्रिभुवन अन्तर्राष्ट्रिय विमानस्थलको उडान तथा अवतरण प्रभावित भएको छ। बाक्लो असिना परेर धावनमार्ग र ट्याक्सी वे ढाकिएपछि दिउँसो करिब २ बजेदेखि विमानस्थलको उडान सञ्चालन अस्थायी रूपमा रोकिएको हो। असिना र वर्षाका कारण विमानस्थलमा अवतरण गर्नुपर्ने कम्तीमा आठवटा विमान आकाशमै होल्डमा परेका छन्। तीमध्ये चारवटा अन्तर्राष्ट्रिय र चारवटा आन्तरिक उडानका विमान रहेको विमानस्थलले जनाएको छ। त्रिभुवन अन्तर्राष्ट्रिय विमानस्थलका प्रवक्ता सञ्जय कुमारका अनुसार बाक्लो असिनाले धावनमार्ग ढाकेपछि सुरक्षित उडान तथा अवतरणका लागि विमानस्थलको सञ्चालन रोक्नुपरेको हो। धावनमार्गमा जमेको असिना हटाउन विमानस्थलको उद्धार तथा अग्निनियन्त्रण सेवा (आरएफएफ) का दमकल परिचालन गरिएको छ। असिना हटाउने छुट्टै उपकरण नभएकाले दमकलको सहायतामा धावनमार्ग सफा गर्ने काम भइरहेको उनले जानकारी दिए। प्रतिकूल मौसमका कारण राजविराज उड्ने तयारीमा रहेको बुद्ध एयरको विमान र बैंकक प्रस्थान गर्न लागेको थाई एयरको विमानसमेत पार्किङ क्षेत्रमा फर्किएका छन्। असिनासहितको वर्षाले विमानस्थलको आन्तरिक टर्मिनल भवनभित्र समेत पानी पसेको छ। आन्तरिक टर्मिनलको चेक इन काउन्टरबाट भित्र जाने क्षेत्रमा पानी जमेर भुइँ जलमग्न भएको छ। यसका कारण विभिन्न गन्तव्यका लागि उडानको प्रतीक्षामा रहेका यात्रुलाई आवतजावत गर्नसमेत समस्या भएको छ। त्यस्तै, सुरक्षा जाँच हुने क्षेत्रको छतमा जडान गरिएका प्यानल लाइटबाट समेत पानी चुहिएको विमानस्थलका अधिकारीहरूले बताएका छन्। विमानस्थल सञ्चालक नेपाल नागरिक उड्डयन प्राधिकरणका एक अधिकारीका अनुसार कमसल छानाबाट पानी चुहिएर टर्मिनल भवनभित्र समस्या भएको हो। जमेको पानी हटाएर यात्रुको आवतजावत सहज बनाउने काम भइरहेको उनले बताए। त्रिभुवन विमानस्थलको आन्तरिक टर्मिनल भवनमा गत वर्षको बर्खायाममा पनि यसैगरी पानी पसेर जलमग्न भएको थियो। अचानक आएको असिना र भारी वर्षाले विमानस्थलको उडान व्यवस्थापनदेखि यात्रुको आवतजावतसम्म प्रभावित भएको छ। विमानस्थल प्रशासनले धावनमार्ग सफा गरी सुरक्षित उडान तथा अवतरणको वातावरण बनाउन काम गरिरहेको जनाएको छ। नियमित उडान कहिलेदेखि सुचारु हुन्छ भन्नेबारे भने स्पष्ट भइसकेको छैन।