अमेरिकी रक्षामन्त्रीविरुद्ध महाभियोग प्रस्ताव अघि बढाउँदै रिपब्लिकन सांसद

काठमाडौं । रिपब्लिकन सांसद थोमस म्यासीले अमेरिकी रक्षामन्त्री पिट हेगसेथविरुद्ध महाभियोग प्रस्ताव अघि बढाएका छन् । उनले यसै साता प्रतिनिधिसभामा मतदान गराउने तयारी गरेका छन् । बीबीसीका अनुसार उनले हेगसेथमाथि अमेरिकी संविधान उल्लंघन गरेको आरोप लगाएका छन् । “कंग्रेसको स्वीकृतिबिना ९० दिनभन्दा बढी समयदेखि इरानमा सैन्य गतिविधि सञ्चालन गरेर मन्त्री हेगसेथले कानुन उल्लंघन गरिरहेका छन् । उनलाई जवाफदेही बनाउनुपर्छ,” म्यासीले भने । आगामी जनवरीसम्म कंग्रेसमा रिपब्लिकनहरूको बहुमत कायम रहने भएकाले महाभियोग प्रस्ताव पारित हुने सम्भावना न्यून छ । म्यासीका अनुसार डेमोक्रेटहरूले आफ्नै महाभियोग प्रक्रिया सुरु गर्नुअघि नै राष्ट्रपति डोनाल्ड ट्रम्पलाई हेगसेथलाई पदबाट हटाउन दबाब दिनु उनको मुख्य उद्देश्य हो । म्यासीले सोमबार प्रतिनिधिसभाको बैठकमा संकल्प प्रस्तावमार्फत हेगसेथविरुद्ध महाभियोगका औपचारिक आरोपहरू दर्ता गराएका हुन् । “म यो काम गरिरहेको छु, किनभने यो सही कदम हो,” प्रस्ताव दर्ता गराएपछि उनले पत्रकारहरूसँग भने । यस विषयमा पत्रकारहरूले सोधेको प्रश्नमा हेगसेथले आफू चिन्तित नरहेको प्रतिक्रिया दिए । उनले मंगलबार बिहान यसै विषयमा पत्रकार सम्मेलन गर्ने पनि बताएका छन् । हेगसेथले यसअघि गत मे महिनामा पत्रकार सम्मेलन गरेका थिए । केन्टकीका सांसद म्यासी इरान युद्ध सुरु भएदेखि नै ट्रम्प प्रशासन र युद्धका आलोचक रहँदै आएका छन् । यस्तै, दिवंगत यौन अपराधी जेफ्री एप्स्टिनसँग सम्बन्धित संघीय सरकारी फाइल सार्वजनिक गर्न प्रशासनमाथि दबाब दिने नेतामध्ये उनी पनि एक हुन् । म्यासीले पहिलोपटक गत सेप्टेम्बरमा हेगसेथविरुद्ध महाभियोग प्रस्ताव ल्याएका थिए । गत साता भएको मध्यावधि निर्वाचनमा रिपब्लिकनहरूले प्रतिनिधिसभा र सिनेट दुवैमा बहुमत गुमाएपछि उनले प्रस्ताव पुनः अघि बढाएका हुन् । उनले हेगसेथलाई पदबाट हटाउने आफ्नो प्रयास आगामी वर्ष डेमोक्रेटहरूले कंग्रेसका दुवै सदनको नियन्त्रण लिएपछि हुन सक्ने महाभियोग प्रक्रियाभन्दा कम विवादास्पद हुने दाबी गरेका छन् । बीबीसी