अमेरिकामा प्रारम्भिक नतिजामा डेमोक्रेट अगाडी, ट्रम्पलाई नोक्सान

काठमाडौं । अमेरिकाका विभिन्न राज्यमा मतदान सकिएसँगै मध्यावधि निर्वाचनको नतिजा आउन थालेको छ । प्रारम्भिक मतगणनामा विपक्षी डेमोक्रेटिक पार्टीले प्रतिनिधिसभामा अग्रता लिएको छ भने सिनेटमा दुवै दलबीच प्रतिस्पर्धा जारी छ । प्रतिनिधिसभाको प्रारम्भिक मतगणनाअनुसार डेमोक्रेटिक पार्टीका उम्मेदवार ६४ स्थानमा अगाडि छन् भने राष्ट्रपति डोनाल्ड ट्रम्पको रिपब्लिकन पार्टीका उम्मेदवार ३० स्थानमा अग्रता बनाइरहेका छन् । प्रतिनिधिसभाका सबै ४३५ सिटका लागि निर्वाचन भएको हो। यस सदनमा बहुमतका लागि २१८ सिट आवश्यक पर्छ । सिनेटका कुल १०० सिटमध्ये यसपटक ३५ सिटका लागि निर्वाचन भएको छ । हाल सिनेटमा डेमोक्रेटिक पार्टीसँग ४३ र रिपब्लिकन पार्टीसँग ३३ सिट रहेको छ। सिनेटमा बहुमत हासिल गर्न ५१ सिट आवश्यक हुन्छ । यसैबीच, अमेरिकाका ३६ राज्यमा भएको गभर्नर निर्वाचनमध्ये अहिलेसम्म करिब १४ राज्यको नतिजा सार्वजनिक भएको छ । सार्वजनिक नतिजाअनुसार रिपब्लिकन पार्टीले आठ र डेमोक्रेटिक पार्टीले छ राज्यमा जित हासिल गरेका छन्। बाँकी राज्यमा मतगणना जारी छ । फ्लोरिडामा रिपब्लिकन पार्टीकी उम्मेदवार एश्ले मुडीले सिनेट निर्वाचन जितेकी छन् । उनले डेमोक्रेटिक पार्टीकी उम्मेदवार एन्जी निक्सनलाई पराजित गरेकी हुन् । मुडी यसअघि फ्लोरिडाकी महान्यायाधिवक्ता थिइन् । यसपटक ३६ राज्यमा नयाँ गभर्नर चयनका लागि मतदान भएको छ । गभर्नर राज्य सरकारको सबैभन्दा शक्तिशाली निर्वाचित पद मानिन्छ । इलिनोइसमा डेमोक्रेटिक पार्टीका जेबी प्रिट्जकर पुनः गभर्नर निर्वाचित भएका छन्। यस्तै, म्यासाचुसेट्समा मौरा हिली, मेरिल्यान्डमा वेस मुर र पेन्सिलभेनियामा जोस शापिरोले पनि पुनः गभर्नर निर्वाचन जितेका छन् । अमेरिकाका पाँच राज्यमा भएको सिनेट निर्वाचनमा डेमोक्रेटिक पार्टीका उम्मेदवार विजयी भएका छन्। डेलावेयर, इलिनोइस, न्यु जर्सी, रोड आइल्यान्ड र म्यासाचुसेट्समा पार्टीका उम्मेदवारले जित हासिल गरेका हुन्। डेलावेयरमा डेमोक्रेटिक पार्टीका क्रिस कुन्सले रिपब्लिकन पार्टीका माइकल काट्जलाई पराजित गर्दै आफ्नो सिनेट सिट सुरक्षित गरेका छन्। न्यु जर्सीमा कोरी बुकरले रिपब्लिकन उम्मेदवार जस्टिन मर्फीलाई हराउँदै पुनः सिनेटमा स्थान बनाएका छन्। रोड आइल्यान्डमा जोन रिड र म्यासाचुसेट्समा एडवर्ड मार्की पुनः सिनेटमा निर्वाचित भएका छन्। इलिनोइसमा पनि डेमोक्रेटिक पार्टीका उम्मेदवार विजयी भएका छन्। यसैगरी, जर्जियाको पाँचौँ संसदीय निर्वाचन क्षेत्रमा डेमोक्रेटिक पार्टीकी निकेमा विलियम्स पुनः प्रतिनिधिसभामा निर्वाचित भएकी छन् । उनले आफ्ना मुख्य प्रतिस्पर्धी रिपब्लिकन उम्मेदवार जोन साल्भेसनलाई फराकिलो मतान्तरले पराजित गरेकी हुन् । The post अमेरिकामा प्रारम्भिक नतिजामा डेमोक्रेट अगाडी, ट्रम्पलाई नोक्सान appeared first on Corporate Khabar : Nepals First Corporate News Magazine and Portal.