भोटेकोशी बाढीपीडितका लागि रेडक्रसले बनाउने भयो दुई हजार घर

काठमाडौं । नेपाल रेडक्रस सोसाइटीले रसुवा र भोटेकोशी क्षेत्रमा बाढीबाट प्रभावित परिवारका लागि दुई हजार आवास निर्माण गर्ने भएको छ। रेडक्रसले एक हजार अस्थायी आवास र एक हजार स्थायी घर निर्माण गर्ने गरी सहमति गरेको हो। नेपाल रेडक्रस सोसाइटीको केन्द्रीय तदर्थ समितिका अध्यक्ष विशालकुमार भण्डारीका अनुसार आवास निर्माणका लागि बिहीबार पूर्वाधार विकास मन्त्रालयअन्तर्गतको भवन विभाग र रेडक्रसबीच सम्झौता भएको छ। सम्झौताअनुसार बाढीबाट घर गुमाएका परिवारलाई अस्थायी आवास, स्थायी घर निर्माण र भाडा सहायतामार्फत राहत उपलब्ध गराइनेछ। घर पूर्ण रूपमा बगाएका करिब पाँच हजार लाभग्राहीलाई भाडा सहायता उपलब्ध गराउने सहमति पनि भएको अध्यक्ष भण्डारीले जानकारी दिनुभयो। उहाँका अनुसार दशैँलगत्तै आवास निर्माण तथा सहायता कार्यक्रमको कार्ययोजना तयार गरिनेछ। सरकारले आवश्यक जग्गा उपलब्ध गराएपछि अस्थायी आवास र स्थायी घर निर्माणको काम अघि बढाइनेछ। ‘रसुवा र भोटेकोशी बाढीबाट प्रभावित लाभग्राहीलाई लक्षित गरी एक हजार अस्थायी आवास र एक हजार स्थायी घर निर्माण गर्ने सम्झौता गरेका छौँ,’ अध्यक्ष भण्डारीले भन्नुभयो, ‘घर बगाएका करिब पाँच हजार लाभग्राहीलाई भाडा सहायता उपलब्ध गराउने सहमति पनि भएको छ। यो सहमति तत्काल कार्यान्वयनमा जानेछ।’ सम्झौताअनुसार आवास निर्माणको नेतृत्व भवन विभागले गर्नेछ भने नेपाल रेडक्रस सोसाइटीले निर्माण कार्य अघि बढाउनेछ। आवश्यक जग्गा उपलब्ध भएपछि कार्यक्रम कार्यान्वयन प्रक्रिया सुरु गरिने अध्यक्ष भण्डारीले बताउनुभयो। भवन विभाग र नेपाल रेडक्रस सोसाइटीका प्रतिनिधिबीच भएको सम्झौताले बाढीबाट घरबार गुमाएका परिवारलाई सुरक्षित बसोवासको व्यवस्था गर्न सहयोग पुग्ने अपेक्षा गरिएको छ।