स्थापना भएको पाँच वर्षमै च्याटबोट प्लेटफर्म क्यारेक्टर डट एआईले दियो टाट पल्टिएको प्रमाणित गर्ने निवेदन

प्रयोगकर्तालाई आफ्नै एआई पात्र बनाउन र तिनसँग कुराकानी गर्न दिने प्लेटफर्म क्यारेक्टर डट एआईले स्थापना भएको पाँच वर्ष नपुग्दै अमेरिकाको अदालतमा च्याप्टर ११ अन्तर्गत टाट पल्टिएको निवेदन दिएको छ। कम्पनीले विभिन्न मुद्दा र आफ्नो लोकप्रिय प्लेटफर्मलाई विस्तार गर्न भोग्नुपरेका कठिनाइका कारण यस्तो कदम चालेको हो। अदालतमा पेस गरिएको कागजातअनुसार कम्पनीको सम्पत्ति र दायित्व दुवै ५ करोडदेखि १० करोड अमेरिकी डलरको बीचमा छन्। “विगत एक वर्षमा क्यारेक्टर डट एआईले महत्त्वपूर्ण कानुनी, नियामकीय र सञ्चालनसम्बन्धी चुनौतीका बीच आफ्नो व्यवसायलाई निरन्तरता दिन र सुधार गर्न अर्थपूर्ण कदम चालेको छ। उपलब्ध विकल्पहरूको विस्तृत समीक्षा गरेपछि कम्पनीको सञ्चालक समितिले अदालतको निगरानीमा हुने बिक्री प्रक्रियाले सबै सरोकारवालाका लागि मूल्य अधिकतम बनाउने उत्तम अवसर प्रदान गर्ने निष्कर्ष निकालेको छ,” क्यारेक्टर एआईका प्रमुख कार्यकारी अधिकृत कोलिन एडम्सले एक विज्ञप्तिमा भनेका छन्। स्टार्टअपले आफ्ना केही सम्पत्ति डिज्नीलाई २ करोड अमेरिकी डलरमा बिक्री गर्न पनि सहमति जनाएको छ। यससँगै डिज्नीले कम्पनीको प्रविधि प्रयोग गर्न गैरविशिष्ट र स्थायी इजाजतपत्रसमेत प्राप्त गर्नेछ। कम्पनीका अनुसार डिज्नीले सेवा हस्तान्तरणका क्रममा सहयोग उपलब्ध गराउनेछ। यो काम गत महिना मनोरञ्जन कम्पनी डिज्नीमा आबद्ध भएका क्यारेक्टर डट एआईका पूर्वकर्मचारीमार्फत हुनेछ। कम्पनीका पूर्वप्रमुख कार्यकारी अधिकृत करनदीप सिंह आनन्द पनि ती कर्मचारीसँगै डिज्नीमा आबद्ध भएका थिए। एडम्सका अनुसार बिक्री प्रक्रिया चलिरहँदा पनि कम्पनीले आफ्नो सेवा सञ्चालन जारी राख्नेछ। यो प्रक्रिया नोभेम्बरको अन्त्य वा डिसेम्बरको सुरुतिर पूरा हुने अपेक्षा गरिएको छ। तर, उनले कम्पनीको सम्पत्ति खरिद गर्न अहिलेसम्म कुनै प्रस्ताव नआएको र खरिदकर्ता पनि तय नभएको बताए। “बिक्री प्रक्रियाबाट क्यारेक्टर डट एआई प्लेटफर्मको सञ्चालनलाई निरन्तरता दिन सक्ने व्यावहारिक प्रस्ताव आउने हाम्रो अपेक्षा छ। तर, त्यस्तो प्रस्ताव उपलब्ध नभए प्लेटफर्मको सेवा बन्द गरिनेछ,” एडम्सले लेखेका छन्। क्यारेक्टर डट एआईका पछिल्ला पाँच वर्ष उतारचढावपूर्ण रहे। गुगलका पूर्व इन्जिनियर नोआम शाजिर र ड्यानियल डे फ्रिटासले सन् २०२१ को अन्त्यतिर स्थापना गरेको यो स्टार्टअपले सुरुमा आधारभूत एआई मोडेलको प्रशिक्षण र प्रयोगकर्ताले आफूअनुकूल पात्र बनाएर कुराकानी गर्न सक्ने एआई च्याटबोट प्लेटफर्म विकासमा ध्यान दिएको थियो। शाजिर ट्रान्सफर्मरसम्बन्धी महत्त्वपूर्ण अनुसन्धानपत्रका सहलेखकसमेत हुन्। सेप्टेम्बर २०२२ सम्ममा प्लेटफर्मको माग बढेसँगै १५ करोड अमेरिकी डलर लगानी जुटाएर कम्पनीको मूल्याङ्कन एक अर्ब डलर पुगेको थियो। त्यसबेला कम्पनीले पाँच महिनामा प्रयोगकर्ताले आफ्ना बटसँग दुई अर्बभन्दा बढी सन्देश आदानप्रदान गरेको जनाएको थियो। सक्रिय प्रयोगकर्ताले दैनिक औसत दुई घण्टाभन्दा बढी समय प्लेटफर्ममा बिताउने गरेका थिए। मे २०२३ मा सार्वजनिक भएको पहिलो सातामै क्यारेक्टर डट एआईका एपहरू १७ लाखभन्दा बढी पटक इन्स्टल भएका थिए। तर, करिब एक वर्षपछि अगस्ट २०२४ मा गुगलले स्टार्टअपका एआई मोडेल प्रयोग गर्ने इजाजतपत्रका लागि २ अर्ब ७० करोड अमेरिकी डलरको सम्झौता गर्‍यो। त्यसपछि शाजिर र डे फ्रिटास दुवै गुगलमा फर्किए। टेकक्रञ्चका अनुसार त्यस समयमा कम्पनीका कानुनी प्रमुख डोमिनिक पेरेला अन्तरिम प्रमुख कार्यकारी अधिकृत बनेका थिए। कम्पनीले आधारभूत एआई मोडेलको प्रशिक्षणबाट ध्यान हटाएर व्यवसाय विस्तारमा केन्द्रित हुने रणनीति अपनाएको थियो। यद्यपि क्यारेक्टर डट एआईको लोकप्रियता घटेन। सन् २०२४ को अक्टोबरसम्ममा प्लेटफर्ममा मासिक सक्रिय प्रयोगकर्ताको संख्या दुई करोड पुगेको थियो। The post स्थापना भएको पाँच वर्षमै च्याटबोट प्लेटफर्म क्यारेक्टर डट एआईले दियो टाट पल्टिएको प्रमाणित गर्ने निवेदन appeared first on Technology Khabar.